¡Que hermosa te dou Dios, terra querida,

desdichada beldá!

¡Que brando e melancólico sosego

sinto ó te contemprar!

¿Por que, por que antre as frores, as espinas

entretexidas van,

nesa coroa que a túa testa ciñe

de verdor eternal?

¡Ouh Galicia, Galicia!, a arpa sonora

pronto descolga xa

da seca ponla onde olvidada dorme,

dorme, a sigros contar.

Os bardos fillos teus a voz levanten

das cordas ó compás,

i enchan o mundo harmónicas i altivas

tan só pra te alabar.