—¡Valor!, que anque eres como branda cera,

aquí en perigro estamos,

e noutro lado a libertá che espera

que aquí ninguén che dera.

—Vamos, señor, a donde queiras... ¡Vamos!

—

—Tan nobre eres, meu ben, como esforzada;

mais, ¡tembras coma a cerva acorralada,

ora que xuntos por ventura estamos

para fuxir, ña prenda namorada!...

—¡Pois, fuxamos... fuxamos!...

—

—¿Tés medo, miña vida,

a seres nos meus brazos sorprendida

e a que xuntos, amándonos morramos?

—¡Ai, non, que a dicha así fora cumprida!...

Mas, partamos... partamos...

¡E adios, paz e virtú, sempre querida!