¡Monteira desfiada!

¡Chaqueta con remendos!

¡Zoquiños que sabedes

de lamas e de seixos!

¡Terróns dos pedrugales

regañados e secos!

¡Legón dos meus suores

calzado en duro aceiro!

¡Traballo santo,

como te quero!

¡A da surrisa triste!

¡A da homilde mirada!

¡A do peito afundido!

¡A da cariña flaca!

¡Probeza, miña moza,

eterna noiva branca

que tras de min, tusindo,

camiñas abafada!

¡Como te quero,

Probeza santa!

¡Non me deixedes soio,

levádeme no medio,

Probeza, miña moza,

Traballo compañeiro!

¡E ó fina-la xornada,

no patrio chan gallego

abride a miña cova

e botádeme dentro!

¡¡Quero caír co corazón sangrando

e cun bico nos beizos!!