/ / Language: English / Genre:poetry

Shakespeare's Sonnets in Romani

William Shakespeare


Shakespeare's Sonnets in Romani

30 years on the Romani horizon

(1974–2004)

Sonnets

by W. Shakespeare

translated into Romani language

(North-Russian dialect)

by Victor Shapoval

Сонэто 001

Кама́са, соб шука́р на хасия́,

Соб гожыпэ́н[1] тэ на́ мэрэл дрэ ба́р,

Коли́ барьякирдо́[2] тэлэ́ пэя́,

Уштэ́ла тэрноро́ буты́р шука́р.

Дыкхэ́са ту дрэ пэ́скирэ якха́,

Хачёса ту ваш пэ́скэ кокоро́;

На́ чярави ваврэ́нгирэ бокха́,

Ивья́ пэс ачявэ́са чёроро́.

Кэрэ́са свэ́то ту шукарэды́р,

Нэ на́миштэс ту вэ́сныца[3] кхарэ́са:

О веко пэ́скро гарави́, — буты́р, джиибэн

Сыр дорэсэ́са пэ́скэ, нашавэ́са.

Дрэ пэ́стэ гаравэ́са холямэ́с

Шука́р хабэ́н: свэто́скэ[4] мо́л тэ дэ́с.

Сонэто 002

Сыр штардэша́ бэрша́ про тро́ чека́т

Брындэ́нца[5] закэрэ́на гожыпэ́н,

Куч[6] тэрныпэ́н, злэи́ барвало́ гад,

Дро пфуй[7] гоно́ джял ко чёрорипэ́н.

Пучен: кари́к кучипэна́ гэнэ́?

Кай сы тырэ́ совнакунэ́ лына́?[8]

Пхэна́са: дрэ якха́, со запэнэ́,

Кай биладжя́киро ладж акана́.

Бари́ паты́в др адава́ гожыпэ́н,

Со пхэ́нла: «Др ада чяво́ бияндло́

Мро рат ракхно́ тэ мро выкиныбэ́н,

Одо́й мро гожыпэ́н патывало́».

Кэ ёв нэвякирэ́са тут пхурэ́с,

Паш лэ́стэ соб о рат тэ таткирэ́с.

Сонэто 003

Тыро́ глында́ло[9] тукэ сыкавэ́л,

Со трэ́би пэс ваврэ́с тэ ачявэ́с,

Соб тыро муй про свэ́то тэ дживэ́л,

Трэби камля́са джиибэ́н тэ дэ́с.

Нэ кай сы ёй, кон патыва́са дэ́ла

Про свэ́то тыро муй шука́р нэвэ́с?

Тэ кон сы ёв, ивья́ кон гаравэ́ла

Дрэ пэ́стэ камлыпэ́н куч холямэ́с?

Лыджя́са ту муй да́киро миштэ́с,

Вавря́кэ соб тэ дэ́с; саро́ проджя́ла:

Пхурьёса, — соб бахтя́са тэ дыкхэ́с:

Муй да́киро тыро́ чяво́ лыджя́ла.

Сыр тут на зрипирэ́са чяворо́,

Мэрэ́са ту, мэрэ́ла муй тыро́.

Сонэто 004

Чюрдэ́са прэ балва́л шукарипэ́н,

Ваш пэ́скэ кокорэ́скэ ту дживэ́са,

Э Дай Бари́[10] барьякирэ́л амэ́н

Дро длуго,[11] — на ивья́. Сыр ту отдэ́са?

О миштыпэ́н лэя́н ту нагиндло́,

Шука́р кофа́ри, соб тэ пиридэ́с;

Ту пэ́са таргинэ́са захало́,[12]

Да бутыпэ́н нашты́[13] тэ продживэ́с.

Шукарипэ́н ваш пэ́скэ гаравэ́са,

Сыр мэрибэ́н явэ́ла, пал мэкно́

Тро кучипэ́н ту со́са плэскирэ́са?

Ко гро́бо пэ́са лэ́са, дылыно́? grave

Тырэ́ чявэ́ на лэ́на тэ дживэ́н,

Тэ на тырэ́ дрэ пхув тут згаравэ́н.[14]

Сонэто 005

Урня́на чя́сы,[15] куч кэри́ буты́,

Тэ гожыпна́са дрэ якха́ джидёна,

Нэ лэ́ндыр тэ ракха́с нисы́р нашты́,

О гожыпэ́н чёрэ́на тэ хасёна.

Ды́кх! На́кхинэ лыджя́на дур лына́й,

Соб дрэ ива́ тэрнэ́с тэ згаравэ́н,

Соб тэ чёрэ́н патря́ — куч совнака́й,

Тэ дэ́н тэл парнэ и́дя гожыпэ́н.

Сыр гожыпэ́н цвэтэ́нца[16] нашадо́,

Парфюмо — о лына́скро кхандыпэ́н –

Дро на́баро баро́-кхэр[17] закэрдо́,

Сыр лэ́скро екхоро́ рипирибэ́н.

Дро шыл кхандэ́на го́жа лулудя́,

На лэ́л оди́, мэк и́дя хаськирдя́.

Сонэто 006

Жыка́й зыма́киро[18] васт о лына́й

На лэ́ла, дрэ чявэ́стэ ракх ту пэс:

Фэды́р на гаравэ́с оди́ ника́й,

Тэ гожыпэ́н. Сыр — нат! Пэс хаськирэ́с.

Явэ́ла тукэ ко́фо барвало́

(Латхэ́ла бахт, ками́ кон плэскирэ́ла),

Сыр тутэ сы чяво́ екх бияндло́,

Коли́ жэ дэш, дэш мо́лы бахт явэ́ла.

Дэш мо́лы дэ́са джиибэ́н тыро́,

Дэш трэ муя́ о свэ́то удыкхэ́ла,

Со мэрибна́скэ, коли тумаро́

Оди́ дрэ тумарэ́ маса́ дживэ́ла.

Да кучипэ́н нашты́ тэ хаськирэ́с,

Муло́ — кирмэ́нгэ ту саро́ отдэ́с.

Сонэто 007

Коли́, сыр совнака́са уридо́,

Традэ́л э ра́т калы́ дэвлы́тко кха́м,

Ґаздэ́ла о шэро́ саро́ джидо́,

Хачёна бахталэ́ — сарэ́ якха́.

Коли́ о кха́м, яга́са хачкирдо́,

Прэ болыбэ́н урня́ла учеды́р, –

Дыкхэ́л о свэ́то, тэлыды́р тэрдо́,

Сыр выгыя́ о Ра́й тэрно́ шуки́р!

Коли́ ж кэ ра́т рисёла о дывэ́с,

Сы кха́м кхино́ сарэ́н тэ татькирэ́л, –

Буты́р нико́н прэ лэ́стэ на дыкхэ́л,

Нико́н якхэ́нца на родэ́ла лэс!

Тэ на́ бистрэн тут — со́ ту ачявэ́са?

Мэк тэ мэрэ́с, джидёл о ра́т чявэ́са.

Сонэто 008

Мири́ Гилы́, гиля́ шунэ́с туга́са.[19]

Палсо́? Коли́ гудло́ камэ́л гудло́.

Палсо́ гудлы́ дживэ́са киркипна́са?

Со тукэ дукхано́ — одо́ камло́.

Акко́рдо чячипна́са башавэ́ла, –

Кхэтаныпэ́н сыр дукх ваш трэ кана́?

Екхорипэ́н пхарэ́с тут чилавэ́ла?

Акко́рдо ракирэ́ла акана́:

Шун, сыр шуки́р о дад э глос подэ́ла,

Екх пал ваврэ́стэ го́жэс кхэтанэ́

Палэ́ — бахталы да́й подухтылэ́ла,

Тэ чяворо́ — э семья, тринджинэ́.

Тринэ́ндыр (шун!) скхувэ́лпэ глос чячи́,

Пхэнэ́ла тукэ: екхоро́ — ничи́!

Сонэто 009

Со́бы тэ на́ киндякир якх пхивля́кэ,

Или палсо́ дживэ́са екхоро́?

Коли́ бы тэ мэрэ́с ту, акадя́кэ

О свэ́то заровэ́лас бы саро́.

Пхэнэ́лас бы кирко́ до роибэ́н:

На ачядя́н ту никонэ́с пал пэ́стэ.

Ваш кажнонэ́ пхивля́кэ гудлыпэ́н — every

Дадэ́скирэ якха́ сы чяворэ́стэ.

Барвалыпэ́н ивья́ росчюрдыно́ –

Ваврэ́нгэ сы про свэ́то ачядо́,

Нэ гожыпэ́н свэто́скэ на дыно́ –

Дро гро́бо сы хула́са нашадо́.

Одо ило́ ваврэ́н сыр покамэ́ла,

Кон пэс ладжя́са дя́кэ хаськирэ́ла?

Сонэто 010

Пхэ́н, со мэк екх оди́ ту, нэ, камэ́са,

Сыр тукэ дрэ саро́ патя́ндынэ,

Пхэ́н, сыр камэ́с, со бутджинэ́ сарэ́са

Трэ хоханэ́ илэ́скэ отдынэ́.

Холы́ тут рикирэ́ла, сыр хула́й,

Сыр лачё кхэ́р ту пхагирэ́са пэс,

Саво́ дынэ́ тукэ о дад, э дай,

Саво́ кучеды́р трэ́би тэ ґаздэ́с.

Парув тыри́ годы́, тэ мэ палэ́:

Коли́ лачи́, сыр ту шука́р, ячеса,

Соб ту на хохадя́н камлэ́ илэ́,

Коли́ пэс чячюнэ́с ту покамэ́са.

Дро камлыпэ́н вави́р соб тэ дживэ́с,

Мирэ́ чявэ́скэ три́ патри́н[20] тэ дэ́с.

Сонэто 011

Сыг вышутёса, выбарьёса сыр

Дрэ тыкнорэ́стэ, бияндя́ конэ́с,

Дро пхурипэ́н да рат тыро́ шуки́р

«Миро́ чяво́» ту лэ́са тэ кхарэ́с.

Дживэ́л о свэ́то дро годьварипэ́н,

Билэ́скро лэ́лас бы о шыл саро́,

Бэрша́ б тэрдёнас дро прастаибэ́н,

О кашт мэя́ бы сыг, яви́ пхуро́.

Э Дай Бари́ ракхэ́л на кажнонэ́с,

Коли́ бибахтало́, мэк тэ хасёл,

Нэ ту жэ куч бахт ла́тыр дорэсэ́с,

Мэк ада бахт чявэ́нца тэ джидёл.

Э Дай Бари́ патри́н оттасадя́,[21]

Сыр бы прэ бут лыла́ тут ачядя́.

Сонэто 012

Жыка́й гина́вас мэ тырэ́ мардэ́,[22]

Дывэ́с совнакуно́ кэ рат явья́,

Лолэ́ лына́ о цвэ́ты нашадэ́,

Тэ соболи́тко[23] бал попарныя́.

Коли́ кашта́ сарэ́ нангэ́ тэрдэ́,

На гаравэ́н кхамэ́стыр гурувнен,

Коли́ гива́ дрэ сно́пы счингирдэ́ sheaves

Парнэ́ шэрэ́нца, дрэ здраны́,[24] кэрэ́н, —

Пал тыро гожыпэ́н пучя́ва мэ,

Сыг улыджя́на лэс бэрша́ ивья́,

Коли́ на удыкхэ́са, хасимэ,

Сыр тэрныпэ́н тыро́ выбария́.

Ада бангэ́ чюрья́тыр тэ ракхэ́спэ

Нашты́, мэк дрэ чявэ́ндэ тэ бьянэ́спэ.

Сонэто 013

Со сан ту пэ́са — адава́ ту сан,

Ничи́ буты́р — дживэ́са и саро́:

Коли́ б ту — ракх Дэвэ́л тут — на мэя́н,

Анэ́л тыри́ патри́н тро чяворо́.

Нашты́,[25] соб гожыпэ́н тыро́ мэя́,

Ачя́в прэ пхув! Дро длуго сы лэно́.

Явэ́са, мэк тро мэрибэ́н явья́,

Дро бияндло́ чяво́ шука́р ячно́.

Ада куч кхэ́р нико́н на пхагирэ́ла,

Саво́ мэклэ́ про свэ́то дай тэ дад,

Мэк тэ тэрдёл, коли́ балва́л пхурдэ́ла

Зыма́киро, дро шыл и вечно[26] рат.

Яв скэ́мпо, мро лачё! Тырэ́ дадэ́стыр greedy

Сан пхутькирдо́: шунэ́с да трэ чявэ́стыр.

Сонэто 014

Пал бахт на роспучя́ва черґэня́,

Астролого́с страха́са на канда́в,

Дром на рода́ва дрэ да патриня́,

Соб би́бахт, гро́бо, дукх тэ ґалёва́в.

На зумава́в тала́но прэ якха́:

Авэ́л о гро́мо,[27] о брашынд раты́?

Таґа́ри сы прэ бахт ли, прэ дукха́? –

Э болыбна́стыр тэ гина́в нашты́.

Екх ма́нгэ — дрэ тырэ́ якха́ дыкхнэ́

О черґэня́ тырэ́ — сы бахталэ́:

Чячё и гожыпэ́н сы кхэтанэ́ –

Ваш трэ чявэ́ндэ, соб шука́р джиндлэ́.

Сыр нат! Мишто́ дыкха́ва: пропэрэ́н

Ивья́ тырэ́ чячё и гожыпэ́н.

Сонэто 015

Коли́ мэ ґалыём: кон выбарьёла,

Шукарипэ́н екха́тыр лэ́стыр джял:

Саро́ сыр бы прэ сцэ́на парудёла,

Бахт парувэ́на черґэня́ упрал.

Коли́ дыкхтём, хай, сыр кашта́, амэ́

Пир болыбны́тко во́ля барьёва́са,

Ґаздэ́лпэ зор тэрны́ куч кхэлымэ́,

На́бут змэки́, амэ́ — рипирибна́са.

Нэ адава́ кэрэ́ла кучеды́р

Тро го́жыма дрэ мрэ якха́, камлы́,

Мэк Хась тэрно́ дывэ́с по-сыгэды́р

Камэ́л тэ парувэ́л дрэ рат мулы́.

Ками́ тут, мэ мэра́ва на ивья́,

Сыр Хась чёрдя́ тут, Лыл бьянэ́л нэвя́.

Сонэто 016

Палсо́ на выкэдэ́с зоралэды́р,

Сыр мри чиб чёрори́ ла́крэ гиля́са,

Соб тыро муй тэ на́ хасёл шуки́р,

Соб тэ марэ́спэ тырэ́ мэрибна́са?

Сан дрэ учё тыро́ бэрш, сыр нико́н,

Чяя́ бут дужаки́рна, сыр барья́,

Соб тутыр нэвэ цвэ́ты тэ барьён,

Шукарэды́р, сыр дрэ мрэ гилорья.

Саро́ нэвякирэ́ла джиибэ́н:

Со сан шука́р э мо́са, сыр э дёса,

Лава́, сыр тро чяво, на сыкавэ́н, –

Мэк манушэ́ндэ дрэ якха́ джидёса.

Гэи́, ячеса дрэ чявэ́ндэ, сыр

Тыри патри́н скэрды́ дрэва́н шуки́р. very

Сонэто 017

Сыр тэ патя́с, нэ шэлбэрша́ гилы́

Пхэрды́ тырэ́ нангэ́ чёрорипна́са,

Дэвэ́л джинэ́л сыр, башавэ́л, камлы́,

Сыр гро́бо, кай чячес тут згарава́са.

Сыр бы тэ сыкава́в якха́ тырэ́,

Дро бутыпэ́н — пхэрдэ́ трэ патыва́,

О амарэ́ чявэ́нгрэ чяворэ́

Пхэнэ́на: хохавэ́на мрэ лава́.

Ту на пхувья́тыр са́нас — болыбна́стыр,

Тэ мрэ гиля́ кошэ́на пуранэ́,

Хай, мэ одрисиёмпэ чячипна́стыр:

«Дро лэ́ско башыбэ́н годы нанэ́».

Коли́ бахт — тэ дживэ́л тырэ́ чявэ́стэ,

Дрэ мри гилы́ дыксёса, сыр дрэ лэ́стэ.

Сонэто 018

Пхэндём, ту сан лына́скиро дывэ́с,

Нэ сан шукарэды́р и татэды́р:

О па́нджто чён пхурдэ́ла холямэ́с,

Пхаги́рла сыго цвэ́тыцы шуки́р.

О кха́м дрэва́н хачки́рла зорало́,

Тэ чя́стэс[28] ёв дрэ тучи[29] гарадёла,

Екх лачипэ́н выврэ́ндыр сы змакхло́,

Тэ на́дужакири вса парудёла.

Нэ на мэрэ́ла екх тыро́ лына́й,

Ничи́ на нашавэ́ла кучипэ́н,

Тут на чёрэ́ла мэрибэ́н ника́й,

Жыка́й мирэ́ гиля́ дро ди́ дживэ́н.

Жыка́й пхурдэ́н, дыкхэ́н о мануша,

Гиля́са лэ́са тэ дживэ́с бэрша.

Сонэто 019

Паруибэ́н, пхагир тырэ́ ная́,

Мэк пхув пэ́скрэ чявэ́н тэ дандырэ́л;

Соб тэ кирнён данда дрэ трэ муя́,

Мэк Фениксо́с о рат тэ хачкирэ́л.

Лаче тэ на́лаче бэрша́ мэк тэ явэ́н,

Сыгэґэри́тко, кэ́р ту, со камэ́с,

Дро саро́ свэ́то лэ́нца, со мэрэ́н,

Нэ екх буты́ нашты́ ту тэ кэрэ́с.

О бры́нды на́ чюв про чека́т камло́,

Да муй тырэ́ порэ́са на́ чила́в,

Да кучипэ́н ту на́ парув гудло́,

Фэды́р ту манушэ́нгэ лэс сыка́в!

Паруибэ́н, тырэ́ бутя́ — ивья́,

Мро камлыпэ́н дрэ мри гилы́ ячья́.

Сонэто 020

Э Дай Бари́ кэрдя́ да кокори́,

Тро муй, хула́й тэ хуланы́ илэ́скэ:

На парудёс адя́кэ, сыр бори́,

Тыро́ ило́ сы ковлэды́р камлэ́скэ.

Якха́ на дя́кэ хоханэ́, сыр ёй,

Саро́ дыкхно́ — кэрэ́на совнака́са;

Илэ́ сы кэ джиня́, джинэ́ — одо́й

Ту раинэ́са шукарэ́ зорья́са.

Сыр э джювлы́ кэрдо́ англатунэ́с,

Ваш лэ́нгрэ гудлыпэ́н о мурш ячья́н;

Э дай Бари́ кэрдя́ ман чёрорэ́с:

На трэ́би ма́нгэ, Ла́тыр со лэя́н?

Со тэ кэра́в? Джювленгэ сан яндло́,

Ками́ ман, лэ́нца кэр, со сы гудло́.

Сонэто 021

Нанэ́ до́ ма́ндыр, мрэ Муза́тыр — до

Шукарипэ́н, кхувэ́ла дрэ гилы́:

Со болыбэ́н дрэва́н шука́р скэрдо́, –

Со ка́жно чиб башэ́л, сыр насвалы́.

Кана́ ёй гудлыпна́са зачивэ́ла:

«Ту кхам, ту чён, сыр пхув сан барвалы́»,

Вэсны́тко лулуди́ тутыр скэрэ́ла:

«Сыр болыбэ́н учё сан бахталы́…»

Чячё дро камлыпэ́н — чячё дро лав:

Попа́тя: сыр э да — чяво́, камля́

кама́м мэ тут. Мэк тэ на хачёва́в,

Сыр ада болыбны́тка момэля́.

Ваврэ́ шарэ́на тут дрэва́н пхаро́,

Мэ ж на бикна́ва камлыпэ́н миро́.

Сонэто 022

Глында́ло сыкавэ́ла, хай, пхуро́,

Коли́ тэрно́ сом, сыр тро тэрныпэ́н;

Сыр удыкха́в трэ бры́нды кокоро́, –

Пола́ва: джян бэрша́ ко мэрибэ́н.

Дыкхи́ шукарипэ́н про муй тыро́,

Сыр бы миро́ ило́ тэрнякира́ва;

Сы дуй илэ́, нэ ка́жно — амаро́,

Сыр жэ мэ тутыр пхурэды́р ява́ва?

Нэ, яв, камлы́, по-ковлэды́р ту пэ́са,

Ту дыкх фэды́р палэ́ миро́ ило́,

Мэ рикира́в тыро́, мишто́ дыкхэ́са,

Сыр роднона́ да — чяворо́ камло́.

На да́ва, на́ манг, мэ ило́ тыро́

Палэ́, коли́ риски́рла мро́ пхуро́.

Сонэто 023

Сыр о актёро дылыно́ дрэ дар

Прэ сцэ́на выпэрэ́ла патриня́тыр,

Сыр холямо́ — хачёла сыр ванга́р

Тэ нашавэ́ла э годы холя́тыр.

Адя́кэ ж мэ дара́ва: паруды́!

Забистырдём татэ́ лава́ хула́скрэ,

Ґалёв, э зор илэ́стыр нашады́,

Киркипэна́ ман ха́на камлыпна́скрэ.

Мэк мрэ лыла́ годя́са ракирэ́на,

Со про ило́, ёнэ́ сы чибалэ́;

Соб ту тэ плэскирэ́с, ёнэ́ пхэнэ́на, –

На чиб мири́, ада лава́ чиндлэ́.

Дыкх прэ лава́: ило́ лэн бичявэ́ла,

Коли́ камэ́с, тыро́ ило́ шунэ́ла.

Сонэто 024

Мри якх кэрдя́ тыри́ шука́р патри́н,

Да лыл гарадыя́ ило́ миро́;

Мро ма́с кана́ ваш тукэ ра́мка[30] сын,

Э перспекти́ва сы мро грасторо́.

Сыр пиро ва́ст, дыкхэ́с мири́ годы́,

Кай сы кана́ патри́н три чячюны́,

Дрэ ба́ндза[31] мрэ илэ́скри гарады́,

Тырэ́ якхэ́нца о́кна[32] хачины́.

Джинэ́с, якха́ бут кэ́рна ваш якха́:

Мирэ́ — тыри́ патри́н шука́р, пирда́л

Тырэ́ якха́ миро́ ило́ дыкха́в,

И тут дрэ лэ́стэ, го́жо, почёрья́л.

На́бут джинэ́н якха́ мрэ хоханэ́:

Ту — сыкады, тыро́ ило́ — нанэ́.

Сонэто 025

Конэ́стэ черґэня́ сы бахталэ́,

Паты́в сы лэ́ндэ, куч прокхарибэ́н;

Ман тыкнэды́р черґэнорья́ латхлэ́,

Паладава́ камэ́л ман камлыпэ́н.

Учес газдёл Шэро́ тэл патыва́,

Нэ таґари́тко камлыпэ́н проджя́ла;

Сыр о кхами́тко цвэ́то дрэ ясва́

Хула́с, змэки́ шэро́, ёв пролыджя́ла.

Шэл выкхэлдя́ Вави́р мэрибэна́,

Нэ сыр пал би́бахт екх сы нашадо́,

Тэ угэнэ́ слава́кирэ лына́,

Тэ ёв пхуро́ мэя́ забистэрдо́.

Сом бахтало́, камло́ мрэ камлыпна́са,

Амэ́ екх биваврэ́скро на джива́са.

Сонэто 026

Кэ Ту, мрэ камлыпна́скиро хула́й,

Трэ патыва́са сом мэ припхандло́;

Кэ Ту лыл бичядём, латхэ́са кай

На мри годы́, миро́ ило́ вчиндло́.

Буты́ — бари́, годы мри — чёрори́,

Пхарэ́с тэ дорэса́в лава́ чячес,

Нэ мэ патя́в, со дрэ годы́ тыри́

Ёнэ́ ячена уридэ́ лачес.

Ґалёв, мрэ черґэня́ лыджя́на ман

Кэ бахт лачи́ тэ кэ паты́в бари́;

Соб мэ патывалэ́с, со мо́л ту сан,

Пхэндём: «Кама́м тут!» — пэ́стыр на́ дари́.

Жыка́й дара́в тукэ тэ сыкава́в

Мро камлыпэ́н, шэро́ дур гарава́в.

Сонэто 027

Дрэва́н кхино́, мэра́ва тэ сова́в,

Соб тэ латха́в масэ́скэ зор нэви́,

Нэ, закэри́ якха́, вса дром кэра́в

Дро мро шэро́, мро мас тэлэ́ чюви́.

Мрэ думы джян, катхы́р мэ рисиём,

Кхарэ́н ман, соб тэ джяв мэ кокоро́;

Паладава́ якха́ мэ откэрдём,

Дыкхи́ дрэ рат калы́, сыр короро́.

Мэ, рикири́ илэ́са три патри́н,

Дыкха́в якхэ́нца, сыр пирда́л о пхар:

Хачёса ту раты́, сыр э мути́н,[33]

Тэ ма́нгэ рат пхури́ дыксёл шука́р.

На дэ́ла ми́ро,[34] — туса рикирдо́

Ило́: саекх дро дром тэ джянгадо́.

Сонэто 028

Нисы́р о ми́ро тэ латха́в нашты́,

Коли́ кхино́ ратенца на сова́ва.

Сыр дывэсэ́ — бутя́, тэ со раты́?

Сыр дывэсэ́: дрэ туга хасёва́ва.

Марэ́нпэ екх ваврэ́са рат-дывэ́с,

Нэ ман ёнэ́ доха́на кхэтанэ́,

Бутя́са — ёв, туга́са — ёй. Пхарэ́с

Кэра́в буты́, нэ дром кэ ту нанэ́.

Пхэндём: «Дывэ́с, ту сан жужо́, сыр ёй»,

Коли́ о кхам тучендыр на дыкха́вас».

Ратя́кэ кало́ муй шардём, одо́й

Сыс черґэня́ — сыр ту, мэ совлаха́вас.

Нэ вса буты́р сы дывэсэ́ бутя́,

Зоралэды́р туга́са хан ратя́.

Сонэто 029

Коли́ о свэ́то, би́бахт ман традэ́на,

Прэ судьба[35] киркорэ́ чива́в ясва́,

Тэ арманя́ мирэ́ вушта́ чюрдэ́на

Ко свэ́нто болыбэ́н паладава́.

Камьём бахталэды́р мэ тэ ява́в:

Совнакунэ́ пора́, барэ́ рая́…

Ґалёв, паладава́ саро́ манга́в,

Сыр бахт на ґалёва́ва адая́.

Коли́ оди́ дрэ туга тасады́,

Мэ рипира́ва, со ту ма́нца сан,

Оди́ бага́ла э гилы́ шарды́,

Урня́ла глос, о кхам шунэ́ла ман.

Тро гудлыпэ́н, камлы, сыр зрипира́ва,

Э таґари́са бахт на спарува́ва.

Сонэто 030

Коли́ про сэ́ндо думы скэдыём,

Мэ зрипирдём саро́, со нашадо́,

Дрэ туга, чёроро́, ґондя́ дыём,

Сыр хаськирдём ивья́, со ачядо́.

Ґара́ шукэ́, киндякирдём якха́

Пал одолэ́ндэ, со ячнэ́ мулэ́,

О камлыпэ́н пхуро́ задэ́л дукха́. –

Кицы́ да мо́л, сарэ́ бахтя́ нашлэ́?

Э туга вави́р мо́ло рисия́,

Тэ ка́жно би́бахт мэ про лав кхара́в,

Тэ — сыр бы мро ило́ на плэскирдя́ –

Тими́н калы́ палэ́ выплэскира́в.

Нэ сыр пал тутэ, го́жо, зрипирдём,

Саро́ шука́р, э туга ачядём.

Сонэто 031

Тыро́ колы́н заклыдынякирдя́

Сарэ́ илэ́, чёрдэ́ э мэрибна́са;

Одо́й о рай сы камлыпэ́н: скхардя́

Сарэ́н, кицы́ мэ згарадём туга́са.

Пал лэ́ндэ мэ киркэ́ ясва́ чидём,

Бикамлыпна́скро, дёса чёроро́;

Нэ мэрибна́стыр ко́фо рискирдём:

Сарэ́н зракхья́ камло́ ило́ тыро́.

Одо́й сы гро́бо, кай ячел джидо́

Мро камлыпэ́н машки́р мирэ́ камлэ́ндэ:

Сарэ́н, сыр миштыпэ́н мро ачядо́,

Мэ да́ва тукэ, ман машки́р бутэ́ндэ.

Дрэ тутэ лэ́нгирэ муя́ дыкха́ва,

Тэ мро саро́ мэ тукэ лэ́нца да́ва.

Сонэто 032

Сыр ту пиридживэ́са мро дывэ́с,

Коли́ кока́лы пра́хо згаравэ́ла,

Ту, дэ́л Дэвэ́л, екх мо́ло подыкхэ́с

Др адава́ лы́л, со тро камло́ чинэ́ла.

Ґалёса, на пир мо́да вычиндло́,

Канатунэ́ бут фэдэды́р кэрэ́на,

Рики́р лэс на ваш и́дя, — ваш ило́,

Мэк бахталэ́ ман пиричюнгардэ́на.

Ваш ма́нгэ тыри дума адая́:

«Коли́ б сыс Муза тэрнэды́р, кон лэс

Камья́, савья́кэ камлыпэ́н дыя́,

Праста́лас бы прэза́л, сыр уклистэ́с. walking

Нэ ёв муло́; гина́ва мэ бутэ́н:

Лэн — пало сти́лё, лэс — ваш камлыпэ́н».

Сонэто 033

Дыкха́вас чя́стэс зо́ри, сыр шука́р

Пирэ́ шэрэ́ якхэ́нца бэ́рги дэ́нас,

Лолэ́ вуштэ́нца чюмидэ́нас чяр,

Парнэ́ паня́ — совнакунэ́ кэрэ́нас.

Нэ калэ тучи чя́стэс закэрэ́н

Муй болыбны́тко пэ́скирэ туга́са,

Гудлэ́ якха́ кхамэ́скирэ чёрэ́н,

Учякирэ́н о свэ́то, сыр пхака́са.

Мро Кха́моро, сыр зо́ря,[36] сыкадёла,

Соб миро муй гудлэ́с тэ чилавэ́л;

Буты́р ададывэ́с ёй на рисёла,

Холямы́ тучя ма́ндыр ла чёрэ́л.

На ла́ва тэ коша́в мро камлыпэ́н:

Кхам гарадёла, сыр про болыбэ́н.

Сонэто 034

Шука́р тыро́ дывэ́с дужакирдём,

Тэ мро думи́тко чюрдыём кхэрэ́;

Нэ калэ тучи закэрэ́нас дром,

Тэ гаравэ́нас тыро муй андрэ́.

Палэ́ сыкадыя́н тэ шутькирдя́н

Ясва́, со ачядя́ брышы́нд про муй;

Нэ палэ мири ла́дж на плэскирдя́н:

Састякирэ́сас, со кэрдя́н ту пфуй.

Ладжя́сас, нэ мри туга на лэя́н,

На забистра́ва, со пириджиндём;

Сави́ буты́, со та́нго, со дрэва́н,

Коли́ мэ дро ило́ дукх лыджиём.

Ясва́ тырэ́ тхадэ́на пиро муй

Тэ улыджя́на, со кэрдя́н ту пфуй.

Сонэто 035

Мэк туга! Со кэрдя́н, забистэрдя́м.

Роза́кэ — пусадя́, панескэ — мэл;

Дрэ тучи гарадён о чён, о кхам,

Дрэ лулуди́ жужы́ — кирмо́ дживэ́л.

Дро грэ́хи сам. Буты́р — мэ кокоро́,

Коли́ парнякира́в три дош ваврэ́нца:

Сом кирнэды́р, сыр грэ́хо на́баро

Мэ простина́ва да барэ́ лавэ́нца.

Мэк мэ ко сэ́ндо тут и притырда́в,

Марэ́лпэ мрэ холя́са камлыпэ́н:

Прэ ма́ндэ ла́ва грэ́хи тэ чюрда́в,

Пал тутэ сом дро розкэдэибэ́н.

Мэ на кэра́ва тукэ пфуй ничи́,

Мэк обчёрдя́н ман, мри чёрны́ лачи́.

Сонэто 036

Трэ́би амэ́н прэ дуй тэ роскэра́с,

Мэк сам дро камлыпэ́н сыр екхоро́:

Ада ладжя́ нашты́ ту тэ лыджя́с,

Со мэ свэто́стыр ха́ва кокоро́.

Ваш камлыпэ́н ячелпэ екх ило́,

Мэк тэ джива́с дрэ дуй ваш джиибэ́н,

Собы тэ на́ кэрэн дром мэлало́,

Коли́ чёрэ́н амэ́ндыр гудлыпэ́н.

На сыкава́ва: сом тыро́ джиндло́,

Собы тыри́ паты́в тэ на́ макха́в;

Шэрэ́са на кэрэ́са лошало́,

Собы тэ на́ мэлякирэ́н тро лав.

На́ кэр адя́кэ: тут ками́, тыри

Сы мири сла́ва, яв жэ лачёри́.

Сонэто 037

Сыр дад пхуро́ дживэ́ла бахталэ́с,

Коли́ дыкхэ́ла, сыр чявэ́ кхэлэ́н,

Адя́кэ ж, дром банго́, хай, лангалэ́с

Кэри́, кама́м чячес тро кучипэ́н.

Тро гожыпэ́н, о ро́до, э годы́,

Барвалыпэ́н тэ, хай, саро́ — кэ мэ

Явья́ тырэ́ бахтя́са, ка́мады,

Тырэ́ шукарипна́са рисимэ́.

На сом буты́р о лангало́ пхуро́,

Коли́ о кхам тыро́ ман таткирэ́ла,

Адя́кэ сы тро кучипэ́н баро́,

Со ма́нгэ екх котыроро́ авэ́ла.[37]

Саро́ шука́р, со тутэ сы, камьём:

Дэш мо́лы мэ бахталэды́р ячьём.

Сонэто 038

Сыр, мири Муза, ма́нгэ подпхэнэ́са,

Коли́ ту, сыр пхурдэ́са, — куч гилы́,

Тырэ́ гудлэ́ лава́ сыр ракирэ́са,

Сарэ́ пора́ здран тэ ухтэ́н про лыл.

Плэски́р пэс кокори́, со мэ латха́ва?

Мэк — на́кирно, мэк — сыр бы битыро́?

Коли́ мэ, сыр бузно́, тут забистра́ва,

Мурдя́кир момэлы́ — сом короро́.

Яв дэ́што, сыр дэш мо́лы кучеды́р,

Сыр одолэ́ еня́ пураныпна́стыр,

Тэ кажнонэ́с ту лы́джя англэды́р,

Мэк тэ дживэ́н шэлбэ́рш э гожыпна́стыр.

Сыр дэ́са ма́нгэ ада гилори́,

Буты́ — мири́, нэ сла́вица — тыри́.

Сонэто 039

Нэ сыр мэ тут форма́льнэс тэ шара́в,

Коли́ сан най-фэды́р коты́р миро́?

Сыр кокорэ́с пэс мэ тэ вытхова́в?

Нэ сыр тэ роскэра́с миро́-тыро́?

Паладава́, нэ, трэ́би, соб тэ джя́в,

Соб камлыпэ́н ячья́пэ екхоро́,

Дура́л локхэ́с сы ма́нгэ тэ пхэна́в,

Со тукэ плэскира́ва кокоро́.

Пхарэ́с тэ на́ кошав екхорипэ́н,

Нанэ́ тыро́ до банг,[38] со джяв аври́:

Мишто́ мэ зрипира́в мро камлыпэ́н,

Соб тэ совэ́л дрэ думы дукх мири́.

Сыклякирэ́са, сыр тэ роскэрэ́с,

Шари́, дуендыр со скэрдо́ екхэ́с.

Сонэто 040

Сарэ́ камлыпэна́ лэ́, Ка́млыпэн!

Буты́р сы тутэ, сыр сыс англэды́р?

Саро́, со да лавэ́са, хай, кхарэ́н,

Миро́ сы тутэ, ма́нца упрэды́р.[39]

Сыр, ман ками́, мро камлыпэ́н лэя́н,

На ла́ва тут тэ бишара́в лавэ́са:

Нашты́, соб ту тут пэ́са хохадя́н,

На зумави́ — со, пэ́стыр отчюрдэ́сас.

Мэ забистра́ва э чёри́, чёрны́,

Мэк мро чёрорипэ́н ту закэдэ́са,

Фэды́р бангэ́с ман ка́м, мри ды́лыны,

Сыр на́ кам ман шылэ́са чячюнэ́са.

О фрэ́нтыма тыро́ на гарадёла:

Ками́ — ума́р, мэк камлыпэ́н джидёла!

Сонэто 041

Тыкнэ́ доша́, со на́ками кэрэ́са,

Коли́ илэ́стыр нашавэ́са ман,

Бэршэ́нца, гожыпна́са дорэсэ́са,

Сыр тут злыджя́на, кай бы на явья́н.

Ковло́ — пиро́ ило́ сан кажнонэ́скэ,

Шука́р — ту кажнона́кэ сан хула́й,

Коли́ джины́ мангэ́ла, э дженэ́скэ

Нашты́ шутлэ́с ла тэ чюрдэ́с, жыка́й…

Кирко, сыр ту мро кхэр на жалинэ́сас,

Ада́й пэс сыкадя́ тро тэрныпэ́н:

Ада́й ту гожыпна́са пхагирэ́сас

Дуеригэ́нгиро патяибэ́н.

Ла гожыпна́са ту улыджия́н,

Тут ма́ндыр гожыпна́са ту чёрдя́н.

Сонэто 042

Со ла лэя́н, нанэ́ екх мири́ туга,

Пхэна́в чячё: камьём ла — мро ди́ сыр,

Ла отлэя́н ту; вави́р туга — друго

Мро нашадо́, одо́ дукха́л буты́р.

Илэ́скирэ чёра, мэ простина́ва:

Ту покамьян, сыр друго ла камья,

Ило́ ёй тукэ отдыя́, патя́ва,

Ваш ма́нгэ: мрэ друго́с ёй покамья́.

Тут нашадём, латхья́ тут мри камлы́,

Ла нашадём, мро друго — ла латхья́н,

Ёнэ́ латхнэ́, дуй мо́лы пьяв шутлы́:

Ваш ма́нгэ хохадэ́ дуй мо́лы ман.

Кай бахт? Сыр мэ друго́са екхоро́,

Ёй, сыр ґара́, сы дро ило́ миро́.

Сонэто 043

Мэ, закэри́ якха́, дыкха́в фэды́р:

Нанэ́ дыкно́, со дывэсэ́ дыкхно́,

Нэ дро сунэ́ дыкха́ва тут шуки́р:

Раты́ хачёла, со сы хачино́.

Сыр учялы́н,[40] сан дрэ якха́ тэрды́,

Сы адала́тыр бахт бари́ якхэ́нгэ:

Сыр дывэсэ́ — тыри́ патри́н пхэрды́,

Коли́ джива́ва ваш мирэ́ сунэ́нгэ.

Сы бахталэ́ мрэ корорэ́ якха́,

Дыкхи́ прэ тутэ дро лачё дывэ́с,

Коли́ раты́ тут дро сунэ́ дыкха́в,

Сова́ва, нэ якха́ дыкхэ́н миштэ́с.

Сыр битыро́, сыс дывэса́ — ратя́,

Э рат — дывэ́с: ило́ тут удыкхтя́.

Сонэто 044

Коли́ б мро мас пхаро́ — ячья годы́,

Ман дром баро́ на затэрдякирэ́ла;

Мэ адатхы́р, сыр дума (сыгэды́р!),

Явьём, кай тро ило́ дужакирэ́ла.

Нанэ́ проблема, кай тэрдэ́ ґэра́,

Сыр тутыр дур сы адая мри риг,

Э дума километрыцы бара́,[41]

Пхувья́, барэ́ паня проджя́ла сыг!

Мэра́в мэ, Дэвла, тэ ачя́в годы́,

Кэ ёй ухтём бы, кай ёй угэя́.

Мро мас (э пхув панеса кэрады́),

Дужакири́, киркэ́с ґондя́ дэя́.

Пхув тэ паны́ дрэ ма́ндэ сы пхарэ́,

Кэрдэ́пэ лэ́ндыр о ясва́ мирэ́.

Сонэто 045

О сано фа́но, яг жужакирды́

Кэ ту сы, коли мэ сом битыро́:

Саекх мро камлыпэ́н, мири́ годы́

Паш тутэ сы локхэ, сыр тхуворо́.

Коли́ да дуй локхэ кэ ту урняна,

Сыр мрэ илэ́скирэ дуй бичядэ́,

Миро́ ило́ пхарэ́ туга́са хана

Дуй ачядэ́, дукха́са стасадэ́.

Коли́ да дуй локхэ тутыр рисёна,

Сыр трэ́би, мас стходо́ тэ зорало́,

Нэ бут кэ мэ долэ́ дуй на тэрдёна:

Сыр ту одо́й? — пучела мро ило́.

Шуна́в дуен; екха́тыр дарандлэ́

Одо локхэ́ рисён кэ ту палэ́.

Сонэто 046

Мри ка́жно якх илэ́са прэ чюрья́.

Нашты́ тэ роскэрэ́н тыри́ патри́н.

Э якх: «Мири́! Кон пэ́рво[42] удыкхья́?»

Ило́: «Мири́! Дрэ ма́ндэ фэды́р сын:

Мэ совлаха́ва куч тэ рикира́в.

Ваврэ́ якха́ дова́ на удыкхэ́н».

Тэ якх годя́са пэ́скэ пхэ́нла лав:

«Миро́ — саро́ дыкхно́ шукарипэ́н!»

Про сэ́ндо сарэ думы скэдынэ́пэ,

Соб куч тэ роскэдэ́н ада буты;

Поракири́ сарэ́нца, припхэндлэ́:

Со да дуенгэ тэ кошэ́н нашты́,

Со сы аврял — якхэ́нгро миштыпэ́н,

Мирэ́са тро ило́ мэк тэ дживэ́н.

Сонэто 047

Якха́ илэ́са роскэрэ́н бажын,

Тэ ка́жно буты́р пэ́скэ дорэсэ́ла,

Коли́ родэ́ла якх тыри́ патри́н,

Коли́ ило́ битыро́ на пхурдэ́ла.

Патря́са свэ́нко якх кэрэ́л илэ́скэ,

Пало́ сками́нд бэшэ́на кхэтанэ́,

Коли́ кэ якх ничи́ нанэ́ ваш пэ́скэ,

Ёй — ко ило́, дыкхэ́ла о сунэ́.

Кэ мэ сан или нат, мэ тут дыкха́ва,

Мэк тут джидя́, мэк три камлы́ патри́н,

Дрэ думы мэ тут го́жэс рикира́ва,

Ило́ сы ма́ндэ, нэ кэ ту исы́н.

Сыр думы сы сутэ, мирэ́ якха́

Розджянгавэ́н ило́: мэ тут дыкха́в.

Сонэто 048

Гэи́ дур, мэ годя́са гарадём

Мро ка́жно кучипэ́н тэло́ клыды́н;

Мэк тэ пасён, жыка́й на рисиём,

Адя́кэ фэдэды́р ракхнэ́ исын.

Нэ ту (ваш тукэ мрэ кучипэна́),

Най-барэды́р мири́ ту туга сан,

Сарэ́ндыр кучеды́р; тут екхджиня́

Сарэ́ жэ могиски́рна тэ злыджя́н.

Тут, го́жо, на чюдём тэло́ клыды́н.

Нанэ́ ника́й адя́кэ зоралэ́.

Саекх ту сан хор дро миро́ колы́н:

Выла́ва, подыкха́ва — тэ палэ́!

Дара́в, чёрэ́на тут и адатхы́р:

Кон вырики́рла? Сан дрэва́н шуки́р!

Сонэто 049

Др одо дывэ́с (явэ́ла ли коли́?),

Сыр ґалыём бы: мрэ доша́ дыкхэ́са,

Тро камлыпэ́н лангала прэ ровли́,

Набут змэки́, о счёто[43] вытховэ́са…

Др одо дывэ́с, коли́, гэи́ пашыл,

Якхэ́нца ма́нгэ кхам на бичявэ́са,

Коли́ тро татыпэ́н ячела шыл,

О камлыпэ́н ту ма́ндыр закэдэ́са…

Др одо дывэ́с подрикира́ва пэс,

Пхэна́ва: о бэрша́ дохана ман,

Ґазда́ва васт, со мэ кэрдём бангэ́с,

Палсо́ ту чячюнэ́с ман чюрдэя́н.

Пирэ́ годы, нашты́ тэ на́ чюрдэ́с,

Со тэ камэ́с дрэ ма́ндэ на латхэ́с.

Сонэто 050

О пхаро дро́м ман выпия́ сарэ́са,

Рода́вас, соб кай трэ́би дорэстём;

Со мо́л откхиныбэ́н, и ту шунэ́са:

«Бут километры тутыр подгиндём».

О грай кхино́, сыр мро ило́, пхарэ́с,

Сыр на́ками, миро́ ило́ лыджя́лас,

Мэ на сыгякира́вас цыпорэ́с,

Мири́ годы́ сыс дур, ман туга халас.

Ёв на кандэ́лас мирэ пусадя́,

Нэ гаравэ́лас хорэды́р холы́;

Сыр ёв, кхино́, киркэ́с ґондя́ дыя́,

Дукх ма́нгэ дэ́лас буты́р зоралы́.

Уса́ ґондя́ шуна́вас адалэ́:

Мри тугица — англал, мри бахт — палэ́.

Сонэто 051

Ту на́ кош да цыпо́с, камлы́, манга́в:

Прэ лэ́стэ тутыр локхорэ́с трада́вас;

Кай сан, палсо́ бы одотхы́р тэ джя́в?

Сыр рисёва́вас бы, на домэка́вас.

Сыр отпхэнэ́лпэ сыго тэ праста́л?

Сыр сыго на́ джя, на́сыг сыкадёла,

Мэ па́ва́ва лэс, соб тэ урня́л,

Сыр э балва́л, про штэтыцо — дыксёла.

Мро камлыпэ́н грэн ачявэ́л палэ́,

Сарэ́ндыр учеды́р коли́ барьёла:

Ничи́ на скэрна сыва йо калэ́,

Коли́ на ма́с — э яг джиды хачёла.

Гэи́ криг тутыр, грай ґэра тырдэ́лас,

Кэ ту праста́ва, соб ёв отачелас!

Сонэто 052

Сыр барвало́, конэ́скиро клыды́н,

Коли́ ками́, ко кучипэ́н мэкэ́ла,

На чя́стэс джя́ла тэ дыкхэ́л, со сын,

Ёв дрэ якха́ э бокх барьякирэ́ла…

О свэ́нки гудлэды́р, сыр нанэ́ бут,

Дуй вэ́сны тэ явэ́н дро бэрш нашты́,

Сыр лачё бар, дыкха́в начястэс тут,

Сарэ́ндыр кучеды́р дрэ ангрусты́.

Тут рикирэ́ла, сыр дрэ тыкнори́,

Э судьба, сыр куч и́дя, гарадя́,

На чястэс ма́нгэ дэ́ла бахтори́,

Соб тэ дыкха́в тут го́жэс откэрдя́.

Ракх тут Дэвэ́л, пал тыро́ гудлыпэ́н,

Сыр битыро́ — пал дужакирибэ́н.

Сонэто 053

Со сы дава́, савэ́стыр сан скэрды́,

Сыр шэл шэла муя́ ту парувэ́са?

Дрэ ка́жно три патри́н напаруды́,

Сави́ патри́н ту пэ́скэ выкэдэ́са?

Адо́нисо — пашэ патри́н тыри́,

Сыр момэлы́ пашо кхам надыкхны́,

Елена сыс э шукарны́ бари́,

Дрэ тутэ ёй вави́р сы налатхны́.

Э вэ́сныца, о барвало́ лына́й

Шука́р тут сыкавэ́на кхэтанэ́,

Ваш гожыпэ́н ту сан сыр о хула́й,

Сарэ́ муя́ сы тукэ дорэснэ́.

Дрэ тутэ ка́жно гожыпэ́н дыкхно́,

Нанэ́ екх тутэ — ило́ чячюно́.

Сонэто 054

Шукарэды́р сы до шукарипэ́н,

Коли́ лачякирдо́ сы гудлыпна́са!

Сыр бахтяки́рна ро́зыцы амэ́н,

Нэ гудлэды́р, коли́ лэн куч сунга́са.

Адя́кэ ж лулудя́ кирнэ́ тэрдэ́,

Дыксёна сыр о ро́зыцы сунги́тка.

Мэк сы дрэ и́дя го́жэс уридэ́,

Балва́л кирнёла лэ́ндыр лынаи́тко.

На кэ́рна бахт илэ́нгэ — хоханэ́,

Шутёна — дылыно́ сы пхурдыпэ́н;

Коли́ ж мэрэ́на ро́зы чячюнэ́,

Амэ́нгэ арома́то ачявэ́н.

Мэк тэ шутёл шука́р тро тэрныпэ́н,

Дрэ мри гилы́ джидёл тро чячипэ́н.

Сонэто 055

Муя́ крали́тка до совнакунэ́,

О мра́моры — хасёна дрэ мэля́,

Тырэ́ якха́ шука́р сы хачинэ́

Пирэ́ шэла́ бэрша́ дрэ мрэ гиля́.

О марибэ́н пхаги́рла да муя́,

Шука́р фэлатина́ тэлэ́ пэрэ́н,

Дрэ холямэ́ яга́ на хасия́

Гилы́, кай сы тыро́ шукарипэ́н.

О мэрибэ́н тэ бокхалы́ холы́

Ґэрэ́нца тасавэ́са, дорэсэ́са:

Чявэ́нгирэ якхэ́нца — бахталы́,

Палатуно́ Дывэ́с ту удыкхэ́са.

Дрэ мри гилы́ сыр лэ́са тэ дживэ́с,

Буты́р дрэ мрэ якха́ ачя́в ту пэ́с.

Сонэто 056

Камлы́, нэвэ́ зорья́са ман облэ́,

Буты́р бокха́тыр екх ваврэ́с кама́са,

Сам камлыпна́са дадывэ́с чялэ́,

Нэ атася́ бокха́тыр, хай, мэра́са.

Ададывэ́с тыри́ бокх камады́

Дрэ трэ шука́р якха́, хай, мурдэя́,

Нэ атася́ палэ́ сы хачкирды́,

Бут на́ чярав ла, со́бы рисия́.

Сыр бут бэрша́, екх битыро́ дывэ́с,

Сыр мо́рё машкир брэ́ги надыкхнэ́,

Про брэ́го коли ма́н дужакирэ́с,

Сыр удыкха́спэ го́жэс дуйджинэ́!

Сыр зы́ма битыро́, нэ о лына́й

Трин мо́лы татэды́р, сыр ту ада́й.

Сонэто 057

Сом тыро ро́бо,[44] со мэ тэ кэра́в?

Дужакира́ва, сыр кхарэ́са ман,

Ада минуты, сыр кэ ту бэша́в,

Тырэ́ лава́, савэ ухтылла кан.

Мэ на коша́ва тут, дужакира́ва,

Дыкхи́, сыр трэ мардэ́[45] на́сыгэс джял,

Мэ киркипна́стыр битыро́ мэра́ва,

Коли́ ту протрадэ́са ман кхэра́л.

Мэ на пучя́ва, са́нас ту конэ́са,

Мэк мро ило́ марэ́лпэ захало́,

Мэ сом тро ро́бо, ма́нгэ на пхэнэ́са,

Кон сы вави́р, кон туса бахтало́.

Камло́ — сыр дылыно́: лэс хохавэ́са,

Нэ ёв патя́ла корорэ́ илэ́са.

Сонэто 058

Дэвэ́л на дэ́ла, ман кэри́ робо́с,

Соб тэ пучя́в, бельвель сыр пролыджя́с?

Пиро́ мардэ́ — конэ́са откхинёс?

Соб ту пало́ сками́нд робо́са джяс!

Дэ́ тэ мэра́в илэ́скирэ бокха́тыр,

Кари́к ками́, урня́са ту псиро́;

Дужакири́ дрэ дукх тут бельвеля́тыр,

Ни ла́в ни паш — мэ, ро́бо сом тыро́.

Джино́м: сан акадя́кэ залыны́,

Со кокори́ кэрэ́са пэ́скэ пла́но,

Камэ́са со, конэ́с? — сан хуланы́,

Ладжя́ тыро́ ило́ нисы́р на ха́на.

Дужакири́ дро а́до,[46] мэ шара́ва

Трэ бельвеля́: куч, грэ́хо ль — на дыкха́ва.

Сонэто 059

Ничи́ нанэ́ нэво́, саро́ ґара

Про свэ́то англэды́р сыс; пхагира́са

Шэрэ́, сыр бы нэвэ́с кхабнэ́ пэра,

Дуй мо́лы бияндлэ́нца лэн лыджя́са?

Нэ ла́са тэ дыкха́с палэ́; пхэрды́

Пандженгри шэлбэрша́ лыла́ дживэ́нас:

Сыка́в тыри́ патри́н, сыр вычиды́,[47]

Сыр бы пхурэ́ тут дро сунэ́ дыкхэ́нас.

Нэ на джино́м, пал тутэ со пхэндлэ́,

Дыкхи́ прэ адая́ буты́ Дэвлы́тко;

Буты́р ли, тыкнэды́р годы́ киндлэ́,

Иль ангрустя́са джя́ла дром свэты́тко.

Ґалёв, шарэ́нас куч пхурэ́ пора́:

Фэды́р сан дэвэлнендыр,[48] тэ мэра́в!

Сонэто 060

Сыр рат-дывэ́с баро́ паны́ пхурдэ́ла,

Адя́кэ амарэ́ минуты джя́на,

Тэ екх ваврэ́с про штэ́то парувэ́ла,

Бэрша́ ж саро́, со сы про свэ́то, ха́на.

Барьёла чён тэрно́ про болыбэ́н,

Собы екх рат коро́на тэ лыджя́л,

Сыг нашавэ́ла пэ́скро пхэрдыпэ́н,

Тэ ды́кх: банго́, пхуро́ ко гро́бо джял.

Бэрша́ барьякирэ́на тэрныпэ́н,

Палэ́ — чювэ́на бры́нды про чека́т,

Бэрша́ э бандины́[49] дро васт ґаздэ́н,

На чяляки́рла лэн джидэ́нгро рат.

Тро гожыпэ́н дрэ мри гилы́ шарав,

Соб ангил васт бэршэ́нгро тэ ракха́в.

Сонэто 061

Ту рикирэ́са мрэ якха́ кхинэ́

Сари́ рат откэрдэ́ трэ гожыпна́са?

Одя́, сыр ту, традэ́на мрэ сунэ́?

Или ту патриня́ пхарэ́ лыджя́са?

Оди́ тыро́ кэ мэ сы бичядо́

Тырэ́ кхэрэ́стыр дур, соб тэ гинэ́с,

Кицы́ дрэ ладж сы́ битыро́ скэрдо́!

Дарэ́с пал ма́ндэ, сыр дрэва́н камэ́с?

Тро камлыпэ́н на дя́кэ зорало́,

Мро́ камлыпэ́н раты́ ман джянгавэ́ла,

На дэ́ла тэ сова́в миро́ ило́,

Ваш тукэ шынгалэ́са[50] служынэ́ла.

Мрэ думы сы, соб мрэ сунэ́ тэ хан,

Коли́ дур ма́ндыр, паш ваврэ́ндэ сан.

Сонэто 062

Сы грэ́хо, нэ камэ́л пэс ка́жно якх,

Саро́ мро мас, оди́ миро́ саро́,

Нашты́ тэ отчюрда́в дош адая́,

Барьёл андрэ́ хор дро ило́ миро́.

Патя́ва: муй саво́ нанэ́ вави́р,

Чячё, шука́р! Шука́р, пир чячипэ́н!

Мэ кокоро́ гина́ва: сом шуки́р!

Ваврэ́ндыр учеды́р дро гожыпэ́н.

Коли́ дыкха́ва мэ буты́р миштэ́с:

Ман парудя́ холя́са пхурипэ́н,

Пэс тэ кама́м ма́нгэ набут пхарэ́с:

Сы др одова тыкно́ хохаибэ́н.

Сыр ту сан мэ, шара́ва кокоро́

Мирэ́ бэрша́ дро го́жыма тыро́.

Сонэто 063

Паш ма́ндэ камлыпэ́н миро́, сыр мэ,

Бэршэ́нца о васта́ вышутькирдэ́,

Рат шылало́, чека́т сы скэдымэ́:

О бры́нды тэрныпэ́н хор гарадэ́.

Сы дром амэ́нгэ дрэ да рат бари́,

О гожыпэ́н, кай сыс ёв рай, родэ́са:

Сарэ́са нашады́ сы ягори́.

Лына́скро кучипэ́н сыр ту зракхэ́са?

Нэ мэ ада чёрья́тыр на дара́ва,

Бэршэ́нгирэ чюрья́тыр сом зракхно́:

Мэ николи́ дава́ на забистра́ва –

О гожыпэ́н гудло́, мэк хасино́.

Шукарипэ́н дрэ мрэ лыла́ дыкхно́,

Одо́й зракхно́ ячья́пэ зэ́лэно.

Сонэто 064

Коли́ дыкхтём бэрша́, сыр хаськирэ́н:

О кучипэ́н баро́ — нанго́, муло́,

Шука́р фэлатина́ тэлэ́ пэрэ́н,

Састы́р кирнёла, ґара́ зорало́.

Э пхув паны́ чинги́рла бокхало́,

О брэ́го дэ́лпэ, трашано́, палэ́;

Э пхув паны́ традэ́ла пасиндло́, –

Барьёна тэ тыкнёна адалэ́.

Коли́ дыкхтём, саво́ паруибэ́н,

Со парувэ́ла пэс ёв кокоро́,

Мэ ґалыём, сыр о бэрша́ явэ́н,

Чёрэ́ла ёв о камлыпэ́н миро́.

О мэрибэ́н нашты́ тэ парува́в,

Кама́м, соб тэ дара́в тэ нашава́в.

Сонэто 065

Састы́р, о бар, пхув тэ баро́ паны́ –

Вса лэ́ла корори́ хась зоралы́.

Сыр вырики́рла[51] ада шукарны́ —

На зоралы́, сыр лулуди́ ковлы́?

Кхандэ́ла дро лына́, сыр э ягви́н,

Нэ улыджя́на дывэса саро́:

Барэ́ бара ковлякирдэ́ исы́н,

Бэрша́ састы́р дандырна, сыр маро́.

Дрэ дар рова́ва: кай тэ згарава́в

Бэршэ́ндыр холямэ́ндыр лачё бар?

Сыр лэ́нгирэ ґэра тэ зрикира́в?

Данда, соб тэ на́ хан саро́ шука́р?

Дова нашты́! Саекх камлы́ патри́н

Дрэ мрэ чиндлэ́ лава́ джиды исы́н.

Сонэто 066

Кхино́, мэ со́м бахтя́са тэ мэра́в,

Сыр куч ничи́ буты́р мэ на латха́в

Прэ пхув, кай бокхалы́ мэрэ́л Паты́в,

Кай Чячипэ́н вытрадыно́ дро и́в,

Кай уриды́ сыр э бори́ Холы́

Бикнэ́ла о чяенгро Жужыпэ́н,

Кай Зо́р кирнэ́с пхутёл э хоханы́,

Раня́са сыкадёл: лав на́ выпхэн!

Кай муй Гиля́кэ запхандло́ миштэ́с,

Кай сыкавэ́ла Дылныпэ́н сарэ́нгэ

О дро́м, кай на дыкхно́ Дэвэ́л амэ́нгэ,

Кай Лачипэ́н кандэ́ла «Нажужэ́с».

Кхино́, мэ со́м бахтя́са тэ мэра́в,

Нэ сыр про свэ́то тут тэ ачява́в?!

Сонэто 067

Катхы́р дрэ лэ́стэ сы да кирныпэ́н?

Саро́ паш лэ́стэ кучипэ́н — шутло́:

О грэ́хо сыкадёл о учипэ́н,

Сыр бы дыксёл набут патывало́.

Палсо́ дро лолыпэ́н чямья́ макхья́,

Соб тэ джидёл о муй, сыр бы муло́?

Палсо́ чачё ладжя́ла гожыпэ́н,

Коли́ ж нанэ́ адя́кэ захало́?

Палсо́ дживэ́ла, коли нашадо́

Саро́, со лэс прэ Пхув, хай, рикирэ́ла?

Мангэ́ла ёв джидэ́ндыр рат джидо́,

Нэ со-то лэ́стыр Ёй дужакирэ́ла:

Соб тэ дыкхэ́н, Ёй рикирэ́ла лэс,

Бэрша́ сыр бут хаськи́рна холямэ́с.

Сонэто 068

Сарэ́ дрома, со прогэя́ чячес,

Прэ лэ́скирэ чямья́ миштэ́с дыкхнэ́:

Кай гожыпэ́н сыс — на латхэ́ла лэс,

Тэ про чека́т бэрша́ на хоханэ́.

Ёв на чёрдя́ бала совнакунэ́

Тэрнэ́ шэрэ́ндыр, соб тэ вытховэ́л,

Соб дуйто мо́ло о бэрша́ тэрнэ́,

Ваврэ́нгирэ лына́, тэ продживэ́л.

Дыксён бэрша́ прэ лэ́стэ прогэнэ́,

Дро макхипэ́н лоло́ на гарадэ́,

На обчёрдэ́ о тэрныпэ́н ёнэ́,

Пэс хоханэ́с, нэвэ́с на уридэ́.

Э Дай Бари́ лэс палдава́ ракхэ́л,

Соб дром о чячюно́ тэ сыкавэ́л.

Сонэто 069

Шарэ́л о свэ́то тут, коли́ ж дыкхэ́ла:

Ничи́ нанэ́, соб тукэ тэ задэ́л,

Оди́ чячё пирэ́ чиба пхэнэ́ла,

О чячипэ́н нанго́ пэс сыкавэ́л.

Якхэ́нца тут ками́, шарэ́на тут,

Нэ адалэ́ жэ са́ма[53] ракирэ́на,

Хай, куч дрэ тутэ — на саро́, нэ бут,

Сыр хорэды́р дрэ тутэ задыкхэ́на.

Пал адава́ дыкхи́ тырэ́ бутя́,

Родэ́на дро ило́ шукарипэ́н:

Ивья́ тырэ́ шарэ́на лулудя́, –

Сыр дылынэ́ чярья́, дэн кхандыпэ́н.

Дыксёса тэ кхандэ́са варчянэ́с,[54]

Сыр кажнонэ́с дрэ шука́р ба́р мэкэ́с.

Сонэто 070

Кошэ́на тут — нанэ́ да ладж тыри́,

Камэ́на тэ макхэ́н шукарипэ́н;

Родэ́на вса э дош, мэк набари,

Сыр э макхин — прэ рупуны́ черґэ́н.

Тро кучипэ́н ґаздэ́н лава́ калэ́,

Тыри́ тими́н барьякирэ́л до мэл

(Сыр ха́ла о кирмо́ пхаба́ гудлэ́)

Тэ жужэды́р сарэ́ндыр тут кэрэ́л.

О тэрныпэ́н тыри́ паты́в зракхья́,

Или о чёр настя́ дрэ ладж аври́, –

На запхандэ́ла адава́ муя́,

Холы́ саекх ячела корори́.

Сыр бы адя́кэ тут тэ на́ макхэ́н,

Лэя́н бы кокори́ сарэджинэ́н.

Сонэто 071

На дурэды́р дрэ туга ту рипир

Пал ма́ндэ, сыр кудуни ту шунэ́са:

Про свэ́то джюнгало́, гэём катхы́р

Ко джюнгалэ́ кирмэ, — кана́ дживэ́са.

Коли́ дыкхэ́са адалэ́ лава́,

Ман на рипир; — адя́кэ зоралэ́с

Кама́м тут, ачява́в на одова́,

Со тут зачилавэ́ла дукханэ́с.

Коли́ мирэ́ лава́ ту удыкхэ́са,

Мэ кокоро́ ячьёмпэ пхув калы́,

Ту на́ хасёв пал ма́ндэ илорэ́са,

На трэ́би лэ́скэ мри патри́н мулы́.

Кирно́ да свэ́то пал тырэ́ ясва́

Чюрдэ́л пр’ амэ́ндэ о кирнэ́ лава́!

Сонэто 072

Сыр свэ́то зачювэ́л тут тэ пхэнэ́с:[55]

Палсо́ камья́н ман, сыр ман покамья́н? –

Ту забистыр сарэ́са ман миштэ́с,

Сыр ту ничи́ дрэ ма́ндэ на латхья́н.

Жыка́й патывало́ хохаибэ́н

Тырэ́ чибатыр на зурня́ндыя,

Тэ ма́нгэ буты́р, сыр дро джиибэ́н,

Тими́н на́чячюны на придыя́,

Ту на́ хохав лаче илэ́са ман:

Мро лав миштэ́с дро гро́бо гарадо́,

На чилавэ́ла ман свэты́тко зан,[56]

Кэ ту да пхэныбэ́н на прикэрдо́.

Кэрэ́ла ма́нгэ ладж хохаибэ́н,

Нэ, забисты́р, со мо́л мро камлыпэ́н!

Сонэто 073

Дрэ ма́ндэ одо чён кана́ латхэ́с,

Коли́ на́бут ячнэ́ патря́ лолэ́,

Коли́ нангэ́ рукха́ здран, — шылалэ́с

Одо́й, кай чириклэ́ куч багандлэ́.

Дрэ ма́ндэ рисия́ кэ рат дывэ́с,

Хай, на дыкхэ́л буты́р о кхам гэно́,

Э рат саро́ закэ́рла локхорэ́с, –

Пхэн мэрибна́скри — о свэ́то кхино́.

Дрэ ма́ндэ яг, ґалёв, паш-мурдыя́,

Кай тэрныпэ́н хачки́рлас вангара́,[57]

Одо́й, кай татыпна́са пхурдыя́,

Сы гро́бо вашо ма́с миро́ ґара́.

Нэ ґалыя́н: э рат мэк пашэды́р,

Кама́са екх ваврэ́с зоралэды́р.

Сонэто 074

Дава́ джиндло́: коли́ ухты́лна ман,

Ивья́ тэ выкина́впэ, закэдэ́н,

Мэ ачява́в ваш тукэ го́жыма,

Со выкхарэ́ла куч рипирибэ́н.

Коли́ одо́ дыкхэ́с — сыр бы саро́,

Со тукэ мрэ илэ́стыр бичядём:

Мэк пхув тэ лэ́л о масоро́ миро́,

Мро ди́, о паш фэды́р, тукэ дыём.

Со нашавэ́са ма́ндыр, ка́млори,

Кирмэ́ залэ́нпэ — миро паш вави́р,

Сыр на лыя́ чёрэ́скири чюри́: –

Дава́ пхувья́кро паш ту забисты́р.

Куч мо́л дова́, дро ди́ со гарадо́,

Дова́ саро́ — сы тукэ ачядо́.

Сонэто 075

Вашо ило́ — маро́ сан, сыр джива́в,

Сыр вашэ пхув шуки́ брышы́нд явья́,

Ваш тыри́ бахт киркипэна́ мэ ха́в,

Сыр барвало́ саво, дара́в ивья́.

Дыкх — пхутькирдо́, сави́ бахт ваш амэ́нгэ!

Дыкх — трашано́ свэто́стыр: сы о чёр.

Кама́м тэ сыкава́в тут манушэ́нгэ,

Кама́м тэ гарава́в якхэ́ндыр хор.

Илэ́скэ дэ́са свэ́нко барвало́,

Нанэ́ чяло́, коли́ б тут тэ дыкха́в;

Коли́ ж на дорэсэ́ла бахт ило́,

Дара́в, буты́р, сыр ма́ндэ, нашава́в.

Тэ ка́жно парудо́ дывэ́с миро́:

Дыкх — барвало́ сом, дыкх — сом чёроро́.

Сонэто 076

Палсо́ мри глос пхарэ́с тэ парува́в,

Паруибна́стыр сом дура́л тэрдо́?

Палсо́ мро дром пхарэ́с тэ рискира́в,

Ко куч подгэибэ́н, нэвэ́с стходо́?

Палсо́ адава́ са́мо вса бага́в,

Якха́ прэ ада са́мо рикири́,

Со ка́жно лав сыр бы кхарэ́л мро лав,

Катхы́р ёнэ́, кари́к — вса ракири́, —

Пал тутэ, камлыпэ́н гудло́, бага́в.

Ваш тукэ, мри камлы́, гиля́, савэ́,

Соб тут тэ урьява́в фэды́р дро лав,

Лав пурано́ дрэ и́дя дав нэвэ́:

Сыр дывэсэ́ о кхам нэво́ пхурьёла,

Мро камлыпэ́н про дром джиндло́ рисёла.

Сонэто 077

О го́жыма тыро́ настя́, — дыкхэ́с, –

Сыр куч дывэ́с пона́бут хасия́;

Сыр гаравэ́л о лыл годы́ миштэ́с,

Соб ёй кэ ту дрэ лэ́стэ рисия́.

Про муй о бры́нды дро тыро́ трюмо́[58]

На гаравэ́н тыро́ рипирибэ́н;

Бэрша́, со ачядэ́ пало́ думо́,

Дром сыкавэ́н ко вечно джиибэ́н.

Со ту рипирибна́стыр нашавэ́с,

Дрэ да лыла́ гара́в, соб ту латхья́н

Чявэ́н, савэ́н забистырдя́н локхэ́с,

Тэ акана́ илэ́са ґалыя́н.

Вса ж дэ́ла адава́ кирки́ годы́,

Со дрэ лыла́ про веки[59] ачяды́.

Сонэто 078

Мирья́ Муза́, бут мо́лы тут кхардём,

Ту дэ́сас да́сави мри зор бари́,

Со бутджинэ́ рисинэ́ про мро дром,

Чивэ́н гиля́ тэлэ́ паты́в тыри́.

Кэ ту и бичиба́кро забага́ла,

О бишэрэ́скро пхакорья́ латхэ́ла,

Конэ́стэ сыс — фэды́р ёв заурня́ла,

Кон го́жо сы — дрэва́н шука́р ячела.

Сом пхутькирдо́: бут мо́л лава́ мирэ́!

Нэ тутыр яг илэ́скири явья́,

Фэды́р паш тутэ мэк бага́н ваврэ́,

Дрэ лэ́ндэ тыри сла́ва бария́.

Саекх, гилы́ мири́, учес шэро́

Ґаздэ́с миро́ ту бигодя́киро.

Сонэто 079

Жыка́й мэ тутыр мири зор мангьём,

Тыро́ шукарипэ́н сыс дрэ гилы́,

Нэ акана́ мри глос мэ нашадём,

Мри Муза насвалы́ сыс дур гэи́.

Пал го́жыма тыро́ уса́ бага́в,

Вави́р кэрэ́л фэды́р, мэ ґалыём,

Нэ со пал тутэ дрэ гилы́ пхэна́в,

Тутыр чёра́в, соб тукэ отдыём:

Лэём дро длуго и чёрдём лава́,

Тырэ́ шукарипна́са сыкадэ́,

Тэ тукэ ж да́ва лэн пал адава́,

Со тутыр сыс ада лава́ чёрдэ́.

Ивья́ ман пал мирэ́ гиля́ шарэ́са,

Со тутыр мэ лыём, — одо кинэ́са.

Сонэто 080

Пал тутэ мри гилы́ зор нашавэ́ла,

Рипири́, со вави́р фэды́р дро лав:

Бари́ годы́ тэ зор ёв сыкавэ́ла, –

Тэ чиб мири́ — спхандлы́. Сыр тэ кхара́в

Шукарипэ́н тыро́? — Паны́ баро́:

Тыкнэ́, пхарэ́ ли ба́рки — рикирэ́ла,

Ничи́ сы ангил лэ́скро мро «чяро́», –

Пирда́л тро лачипэ́н саекх дживэ́ла.

Тро васт ковло́ рики́рла ман опра́л,

Ёв кэ́рла дром пир тутэ, кай камэ́л,

Сыр — пхагирдо́ — дав, чёроро́, муя́л,

Ёв учипна́стыр лэ́ла тэ дыкхэ́л:

Мэк ёв опрэ́, мэ — чюрдыно́ аври́,

Кама́м, сыр камлыпэ́н сыс хась мири́.

Сонэто 081

Мэ ль ачява́в про гро́бо тыро лав,

Или ту ман дро гро́бо удыкхэ́са,

Мэк дрэ сарэ́ годя́ тэ хасёва́в,

Ту адатхы́р про веки ачявэ́са.

Тро лав зоралэды́р, сыр мэрибэ́н,

Мэ екх рипирибэ́н на ачява́ва,

Ман лэ́ла пхув, сыр сарэ́ манушэ́н,

Тут дрэ якха́ джидэ́ мэ згарава́ва.

Дрэ мрэ гиля́ ту лэ́са тэ дживэ́с,

Якха́ чявэ́нгирэ тут удыкхэ́н,

Высыкляки́рна тут чиба́ миштэ́с,

Пиридживэ́с амэ́н сарэджинэ́н.

Джиды́ сан дрэ лава́ — мири́ гилы́

Ваш тукэ сы адя́кэ зоралы́.

Сонэто 082

Прэ бахт, нанэ́ мри Муза три ромны́,

Ничи́, мэк мрэ лава́ ту на шарэ́са,

Коли́ мири́ гилы́ на шукарны́, –

Ту да́савья латхэ́са, кай камэ́са.

Годя́са, сыр и пэ́са, сан шуки́р,

Латхэ́са дро мро лав чёрорипэ́н,

Ма́нгэс, соб тэ рода́в лава́ фэды́р,

Тэ сыкава́в екха́тыр гожыпэ́н.

Кэра́в адя́кэ: нэ коли́ ваврэ́

Вса дорэсэ́н дрэ на́ртыма[60] учё,

Ґалёса: дрэ чяче лава́ мирэ́

(Дава́ мо́л бут) сы мро ило́ чячё.

Мэк сыкавэ́н ваврэ́ патри́н фэды́р.

Со тукэ трэ́би? — О рат лолэды́р?

Сонэто 083

На трэ́би тукэ макхипэ́н, патя́в,

Тэ на дыкхтём прэ тутэ николи́,

Шукарэды́р сарэ́стыр да латха́в,

Со ковлыпэ́н кэрэ́ла дрэ гилы́.

Паладава́ лава́ мэ зрикирдём,

Соб ту пэс кокори́ сыкадэя́н,

Сыр дывэсэ́стыр упрэды́р тро дром,

Ивья́ шарэ́на тут, соб бария́н.

Сыр миро грэ́хо вытходя́н дова,

Со биглося́киро мро шарибэ́н;

Сыр тутыр тэлэды́р мирэ́ лава́,

Ваврэ́ ж кэрэ́н паты́в, сыр умарэ́н.

Ка́жно три якх буты́р дэл джиибэ́н,

Сыр дуй тырэ́ поэ́ты накхувэ́н.

Сонэто 084

Нико́н — саро́! Кон выпхэндя́ буты́р:

Хай, ту сан ту, гиля́са ракири́,

Дро миштыпэ́н ада́савья шуки́р,

Сыр тут, дрэ дар ваш пэ́скэ рикири́?

Нашты́, нэ сыр мэк на́бут бутэды́р

Тэ на́ дэс го́жыма, коли́ бага́са;

Екх одова́, кон сыкавэ́ла, сыр,

Хай, ту сан ту, барьёла трэ слава́са.

Мэк тэ кэрэ́л э чёрори́ патри́н,

Нэ на тховэ́ла хоханэ́ лава́,

Да́саво муршыпэ́н чячё исы́н,

Ачела, кай на лэ́, шардо́ дова́.

Коли́ ж тут гудлыпна́са бишарэ́н,

Ками́ дова́, прилэ́са кошыбэ́н.

Сонэто 085

Мри Муза чиб рики́рла тэ ило́,

Сыр бутджинэ́ бага́на шарибэ́н;

Совнакунэ́ порэ́са зачиндло́,

Со лэ́нгэ сарэ́ музы куч скэдэ́н.

Лачё ило́, машки́р лаче лава́,

Вса на́барэ годя́са тут камэ́ла,

Тэ пал шука́р гиля́ екх адава́:

«Аи́-аи́!» — нэ пэ́скиро, додэ́ла.

Шарэ́на тут, тэ мэ: «Аи́-аи́!»,

Мэк лаворо́ дода́ва бутэды́р;

О камлыпэ́н илэ́са ґаздэи́,

Лава́ — палэ́, ило́ сы англэды́р.

Чюв э тими́н лавэ́нгэ, сыр пхурдэ́н,

Тэ мрэ илэ́скэ пало чячипэ́н.

Сонэто 086

Барэ́ пхакэ́нца лэ́скири гилы́

Тро гожыпэ́н лыя́ тэ дорэсэ́л,

Дова́ кэрэ́л годы́ мри лангалы́,

Вашэ гилы́ миро́ ило́ мэрэ́л.

На-манушы́тка ль лэс сыклякирдэ́?

Лэ́скрэ гиля́тыр сом, ґалёв, муло́.

Нашты́, соб на́жужэ дова́ кэрдэ́?

Кай мри гилы́? Дынэ́ ман якхало́?

Нат! На дова́ кхэри́тко, кон годы́

Додэ́ла лэ́скэ дрэ гиля́ раты́,

На лэ́са мири чиб зарикирды́,

Нанэ́ мри дукх пал адая́ буты́.

Коли́ дживэ́с дрэ лэ́скиро шэро́,

Ничи́ — ваш ма́нгэ, мэ сом чёроро́.

Сонэто 087

Дэвлэ́са! Э тими́н тыри́ буты́р,

Сыр ма́ндэ. Ту джинэ́с, мэ плэскирдём,

Нэ мри кисы́к[61] илэ́стыр тыкнэды́р,

Со ма́ндэ сыс, дрэ тутэ нашадём.

Сыр мангипна́са тут тэ рикира́в?

Кай мрэ кучипэна́ пал адалэ́?

Пал да́савьятэ мо́л саро́ тэ дав,

Паладава́ прэ во́ля сан палэ́.

Ту ма́нгэ дэ́сас, на́мишто гинэ́сас,

Или джинэ́сас на́мишто ту ман:

Фэды́р — саро́ палэ́ бы закэдэ́сас,

Ваш ма́нгэ зоралэ́с лачи́ ту сан.

Мири́ ту са́нас, акана́ — нанэ́,

Таґа́ри со́мас на́бут дро сунэ́.

Сонэто 088

Коли́, мро Кхам, ваш ма́нгэ замурдёса,

Чюрдэ́са про сабэ́н миро́ ило́,

Подрикира́ва тут мэ сарэ дёса,

Мэк тэ явэ́л чячюныпэ́н кошло́.

Мро кирныпэ́н фэды́р ваврэ́ндыр мэ

Ангил сарэ якхэ́ндэ откэра́ва,

Ваш тукэ мрэ доша́ гарадымэ́

Прэ тыри́ бари́ сла́ва парува́ва:

Ваш пэ́скэ ачява́ва екхоро́:

Миро́ ило́ камло́ мэ хаськира́ва,

Коли́ дукх дэ́ла васт мро пэ́скиро,

Со дорэстя́н — дуй мо́лы дорэса́ва.

Ками́ тут, ваш тыри́ холы́ — нанго́,

Соб тэ явэ́с ту чячюны́ — банго́.

Сонэто 089

Пхэ́н, хай, палэ́ екх дош ман чюрдэя́н,

Тэ хачкирдэ́с мэ тут подрикира́ва,

Коли́ б, хай, лангало́ сом, ту пхэндя́н,

Мэ заланга́ва, лав на выпхэна́ва.

На дя́кэ дукхано́, со ту скэрдя́н,

Соб сыр бы чячюнэ́с ман тэ чюрдэ́с,

Мэ кокоро́ скэра́ва, сыр камья́н,

Соб тукэ ман локхэ́с тэ ачявэ́с.

Дур рикира́впэ, тэ прэ чиб мири́

Тро лав гудло́, камло́ мэ на мэка́в,

Со́бы пирда́л годы́ мри на́бари,

Со ман джинэ́сас, мэ тэ на́ пхэна́в.

Ваш тукэ и прэ ма́ндэ мэ ушта́ва:

Конэ́с ту на камэ́с, и мэ на ла́ва.

Сонэто 090

Ман на́дыкх, сыр камэ́с, коли́ камэ́с,

Кана́ о свэ́то мрэ бутя́ пхаги́рла,

Хаськи́рна бибахтя́ ман локхорэ́с,

Мэк тыро васт буты́р на дужаки́рла.

Коли́ пхэрдо́ дукха́са мро ило́,

Ту на́ мар дро думо́ ман, камлыпэ́н,

Сыр ячявэ́л э рат брышы́нд кало́,

Соб тэ кэрэ́л пал ма́ндэ жужыпэ́н.

Чюрдэ́са ман, нэ на палатуны́,

Коли́ киркипэна́ выпьена зор,

Ту чюрдэ ман екха́тыр, хоханы́,

Соб мэ екха́тыр ґалыём да хор:

Да киркипэ́н на зоралэ́с баро́,

Коли́ б тэ на́ ачявпэ битыро́.

Сонэто 091

Кон сы пхурэ́ папэ́ндыр пхутькирдо́,

Годя́тыр — екх, ловэ́ндыр — сы вави́р,

Кон — пирэ и́дя, мэк ёв паш-джидо́,

Пирэ джюклэ́ндэ, грэ́ндэ, сыр шуки́р.

Кэ пэ́скиро сы ка́жно припхандло́

Машки́р сарэ́ кучипэна́ саекх;

Пал ма́ндэ адава́ на сы пхэндло́,

Илэ́са мэ сом отдымэ́ ко екх:

Тро камлыпэ́н сарэ́стыр кучеды́р, –

Со па́пы? Со годы́? Ловэ́ додэ́!

Грая́ тэ и́дя — ма́нгэ тыкнэды́р

Сы тутыр, мэк сы бутэды́р шардэ́.

Закэ́дэ ма́ндыр ту саро́ тыро́,

Нэ со́са ж мэ ачя́впэ, чёроро́?

Сонэто 092

Сыр ту чёрэ́са ма́ндыр тут аври́,

Екха́тыр лэ́са джиибэ́н миро́:

На дурэды́р дрэ ма́ндэ рикири́,

Жыка́й дживэ́ла камлыпэ́н тыро́.

На трэ́би тэ дара́в: чёра́, дукха́

Сыр дорэсэ́на ман бибахталэ́с?

Джива́в, жыка́й дыкха́в тырэ́ якха́,

Дрэ ма́ндэ раинэ́са, сыр камэ́с.

Ту ман чюрдэ́са? Со мэ тэ кэра́в:

Мро джиибэ́н про тхав ту рикирэ́с,

Э бахт йэ хась екха́тыр мэ латха́в:

Кама́м тут — и мэра́ва бахталэ́с.

Нанэ́ бахт бидара́кири — илэ́са

Мэ на джино́м: ту ман на хохавэ́са?

Сонэто 093

Сыр тэ джива́в, коли́ ту парудя́н?[62]

Тэ хав хохаибэ́н? Куч сыкавэ́са

Якхэ́нца камлыпэ́н, нэ вави́р сан:

Дыкхи́ прэ ма́ндэ, кэ вави́р — илэ́са!

Тырэ́ якха́ про бал[63] на парудэ́,

Одо́й мэ на латхав вави́р патри́н:

Сыр бы якха́ э ладж на гарадэ́,

Ёнэ́ чивэ́н — на киркипэ́н, ягви́н.

О болыбэ́н адя́кэ тут скэрдя́:

Саекх про муй дживэ́ла гудлыпэ́н;

Тыри́ годы́ кирнэ́с ман хоходя́,

Нэ камлыпна́са трэ якха́ дыкхэ́н.

Пхаба́й дыя́ Ева́кэ — гожыпэ́н,

Катхы́р джювля́тэ сы начячипэ́н?

Сонэто 094

Яви́ холы́, ёнэ́ ла пририки́рна,

На сыкавэ́на зор дро пхэрдыпэ́н;

Сыр о бара́, ваврэ́н жэ крэнцаки́рна,

Тэрдэ́ про штэ́то дро шылалыпэ́н.

Бахт болыбна́стыр дорэсэ́н ёнэ́,

Пхувья́тыр лэ́нгэ — барвалыпэна́;

Савэ́ муя́ прэ лэ́ндэ райканэ́:

Сарэ́ рики́рна откэрдэ́ кана́.

Сы лынаи́тко цвэ́то ваш лына́й,

Ваш пэ́скэ со́? Ёв сы́го зашутёла.

Нэ сыр кирмо́ ячья́ лэ́скро хула́й, –

Чяр дылыны́ шукарэды́р дыксёла.

Яви́ шука́р, кон кэ́рла мэлалэ́с,

Сыр ли́лия — кхандэ́ла нажужэ́с.

Сонэто 095

Сыр го́жэс ту э ладж гудлякирэ́са,

Сави́ сыр о кирмо́ дрэ лулуди́,

Э мэл про тро цвэты́тко лав анэ́са! –

Сы гожыпэ́н — авря́л, э дош — дро ди́.

Чиба́, савэ́ пал тутэ тхув кхувэ́ла,

Шутлы́ додэ́на пэ́стыр дро кана́,

Тут, на́ками, пир арманя́ шарэ́на,

Буты́р шуки́р цвэты́тко лав кана́!

Сави́ куч фэлати́н ту выкэдэ́са

Вашэ́ доша́? — Хачёл сыр лачё бар!

Трэ гожыпна́са лэн учякирэ́са,

Вашэ якха́ кэрэ́нпэ куч-шука́р.

Тро гожыпэ́н зор адая́ рики́рла:

Нэ зоралы́ чюри́ — о бар пхаги́рла.

Сонэто 096

Екхэ́нгэ — дош, хай, сан тэрны́, локхи́;

Ваврэ́нгэ — куч, хай сан, локхи́, тэрны́;

Тырэ́ доша́ — гудлэ́, миштэ́с дыкхи́,

Тро гудлыпэ́н сы дош, мри шукарны.

Сы таґарня́тэ про ангушт о бар,

Мэк на́куч, нэ сарэ́ чячес шарэ́на:

Коли́ доша́ — тырэ́, ёнэ́ — шука́р,

О чячюнэ́ кучипэна́ ячена.

Бут бакрорэ́н о рув бы ухтылдя́,

Чюви́ прэ пэ́стэ цы́па[64] бакраны́;

Сыр бут якхэ́н годя́тыр злыджия́н,

Коли́ б зор сыкадя́н, тукэ дыны́.

На́ кэр адя́кэ: тут ками́, тыри́

Сы мири сла́ва, я́в жэ лачёри́.

Сонэто 097

Сыр зы́ма сыс дрэ ма́ндэ битыро́,

Праста́лас бэрш, сыр цы́по прэ якха́,

Сыс ма́нгэ шылало́; хай, короро́;

О дэ́што чён нанго́ — дэя́ дукха́.

Адя́кэ битыро́ гэя́ лына́й,

Ёв ачядя́ барьякирдо́ баро́,

Сыр э пхивлы́, коли́ мэя́ хула́й,

О пэр пхэрдо́ лыджя́л дрэва́н пхаро́.

Нэ ма́нгэ адава́ барвалыпэ́н

Дыксёлас бидадэ́скри бахт калы́,

Сыр битыро́, кирко́ сыс гудлыпэ́н,

Тэ забистрэ́нас чирикля́ гилы́,

Сыр багандлэ́ — дрэ туга доханы́,

Патря́ мардя́ зыма́кири здраны́.

Сонэто 098

Вэсна́киро мэ со́мас битыро́,

О шта́рто чён саро́ куч уридя́,

О тэрныпэ́н дыксёлас дрэ саро́,

Тэлэ́ черґэ́н Сатурно рат кхэлдя́.

Нэ чирикля́ тэ цвэ́ты кхандунэ́

На джидяки́рнас мро ило́ дрэ туга,

Ничи́ дрэ дывэса́ совнакунэ́

Мэ на дыкхтём, сыр лулудя́ про луго.[65]

Мэк ли́лии парнёнас, на сунга́вас,

Лолёнас ро́зы — на скэда́вас лэн,

Др одо шукарипэ́н мэ тут рода́вас,

Мангьём, соб три патри́н тэ сыкавэ́н.

Хай, зы́ма сыс, мэк вэ́сна куч явья́,

Одо́й рода́вас три патри́н ивья́.

Сонэто 099

Мэ пэрвона́ фиалкица́ пучьём:

«Мри гудлори́ чёрны́, кай ґазбадя́н

Куч арома́то, лолыпэ́н? Джиндём:

Кэ мри камлы́! Ту ла́тыр да чёрдя́н?»

Тэ ли́лия, сыр ухтылдём мэ ла,

Лыя́ трэ васторэ́ндыр парныпэ́н;

Кэ майора́но сы тырэ́ бала́,

Тэ ро́зы, со чёрдэ́, на гаравэ́н:

Екх — ладж лолы́, парны́ холы́ — вави́р,

Сарэдуендыр три́то со чёрдя́? –

Тро пхурдыпэ́н тато-шудро́ шуки́р;

Тэ ка́жно го́жэс прэ чёри́ джиндя́.

Мэк о кирмо́ чёрнен и хаськирдя́.

Бут лулудя́ вэсна́киро дрэ бар:

Сарэ́ чёрэ́на тутыр, со шука́р.

Сонэто 100

Кай сан, мри Музалэ? О дром забистырдя́н?

Палсо́ на ракирэ́с, три зор катхы́р?

Дрэ пфуй гилы́ тыри́ холы́ чидя́н?

Дрэ мэл пэя́н, кирнэ́н кэри́ фэды́р?

Рисёв! Пал адава́, со нашадя́н,

Плэски́р гиля́са др адалэ́ кана́,

Вашэ савэ́ прибичяды́ ту сан,

Дэ тема тэ подгэибэ́н[66] кана́.

Нэ, Музалэ, ба́га пал Камлыпэ́н,

Коли́ бэрша́ екх бры́нда ачядэ́,

Ума́р лавэ́са адалэ́ чёрэ́н,

Мэк тэ лачякирэ́н, со пфуй кэрдэ́.

Жыка́й мро Камлыпэ́н джидо́, ша́р лэс,

Соб лэс э Мэрибна́стыр тэ ракхэ́с.

Сонэто 101

Локхэшэри́тко Муза, со чювэ́са

Вашо хохаибэ́н дро го́жыма?

Сыр сарэдуй спхандлэ́ да манушэ́са:

Слава́са чяравэ́ла тут, сыр ман.

Пхэ́н ма́нгэ, со пхэнэ́сас атася́:

«О чячипэ́н на трэ́би тэ макхэ́с.

Палсо́ э гожыма́скэ куч глося́?

Со гожэды́р сарэ́ндыр — удыкхэ́с».

Палсо́ э кучипна́скэ шарибэ́н?

На сан ту бичиба́кири — хоха́в!

Соб, сыр куч гро́бо пир бэрша́ шарэ́н,

Шунэ́нас саро́ свэ́то лэ́скро лав.

Кэ́р, Музыца, буты́, соб тэ дживэ́л

Ёв дрэ якха́, коли́ лэс гро́бо лэл.

Сонэто 102

Мро камлыпэ́н барьёла — на хачки́рла,

Кама́м буты́р, нэ на́бут ракира́в;

Патя́в, одо ило́ тимисяки́рла,

Конэ́стэ сы ваш саро́ свэ́то лав.

Вэсны́тко камлыпэ́н, сыр о тыкно́ сыс,

Тэ мэ шардём лэс бут дрэ мрэ гиля́,

Сыр мэ шука́р бага́вас соловьёса,[67]

Адя́кэ жэ чюрда́ва мрэ шоля́.

Лына́й нанэ́ кирко, мэк на бага́са,

Мэк о гиля́ нанэ́ шундлэ́ раты́,

Амэ́ кана́ илэ́ на джянгава́са, –

Коли́ кхинэ́ совэ́на, да нашты́.

Сыр о соло́вьё, чиб придандырдём:

Соб на пхэндя́н, со мэ шутло́ ячьём.

Сонэто 103

Савэ́ ту, Муза, злы́дни[68] скэдыя́н?

Сыр адалэ́ндыр сла́ва тэ скхува́с?

Ничи́, шуко́ маро́ дро свэ́то хан.

Бут лон одо́й на ла́са тэ чюва́с.

Ман на кош, ра́я, пхагирдём мро пор!

Дро дыкхлано́ глында́ло[69] сыкадёла

Тро муй буты́р, сыр чёрори́ мри зор,

Мри шарибна́стыр гожэды́р… трин мо́лы.

Палсо́ жэ тэ макха́в тро муй лавэ́са?

Мэ акана́ жэ ла́ва тэ бага́в,

Сыр сан лачё, сыр бут ту плэскирэ́са.

На хохавэ́ла дыкхлано́, сыр лав.

Бут бутэды́р, сыр мэ пхэна́в лавэ́са,

Дро дыкхлано́ ту кокоро́ дыкхэ́са.

Сонэто 104

Ваш ма́нгэ николи́ ту на пхурёса,

Шука́р, сыр пэ́рво мо́ло тут дыкхтём,

О гожыпэ́н напарудо́ — дыксёса.

Трин мо́лы зы́ма сыкавэ́лас дром

Лына́скэ; тэ трин вэ́сны парувэ́лас

Дрэ о́сени; сунги́тко шта́рто чён

Дро шо́вто чён трин мо́лы кэравэ́лас, –

Нэ ту уса́ шука́р сан, сыр нико́н.

Ґалёв, тро пхурипэ́н, сыр про мардэ́[70]

Ангушт, со подчёрэ́лпэ надыкнэ́с,

Тырэ́ бэрша́ про штэ́то на тэрдэ́,

Нэ мэ да на дыкха́ва — корорэ́с.

На́ дар, со ту пхурёс: ту бияндлы́,

Коли́ сыс гожыпна́скри хась мулы́.

Сонэто 105

Кама́м ла на сыр дэвэлня́ савья́,

Ико́на на кэра́ва мрэ камля́тыр,

Мэк мрэ, ґалёв, сарэ́ бага́н гиля́ –

Ваш ла́кэ, ла, пал ла́тэ, ла́са, ла́тыр.

Лачи́ ададывэ́с, сыр атася́,

Дро кучипэ́н учё на парудёла,

Паладава́ мири́ гилы́ — уса́

екхэ́са камлыпна́са сыкадёла.

Шука́р, лачи́, жужы́ — уса́ бага́ва,

Жужы́, шука́р, лачи́ — ваврэ́ лавэ́нца;

Трин мо́лы на тринэ́н — екха́ кхара́ва,

Фэды́р мэ на латхьём сарэ́ зорьенца.

Лачи́, Жужы́, Шука́р — бут да́савьен,

Екха́ мирья́ сыр «трин дро екх» кхарэ́н.

Сонэто 106

Коли́ прэ пуранэ́ лыла́ дыкха́ва

Годявирэ́ лава́ пал одова́,

Савэ́ ґара́ сыс гожыпэ́н и сла́ва,

Таґа́рья, шукарня́… — кана́ тхува́.

Пхурэ джиндлэ́, кай тэ латхэ́н э зор,

Васт, муй, якх, вушт — про лыл соб тэ дживэ́н;

Сыс лэ́ндэ да ракирибны́тко пор,

Соб тро шукарипэ́н тэ сыкавэ́н.

Ёнэ́ пхэндлэ́, со ту явэ́са, сыр

Шука́р суно́. — Кана́ сан паш амэ́ндэ,

Нэ на дыкхэ́нас тут, сави́ шуки́р,

Соб тэ збага́н зорья́са, со сыс лэ́ндэ.

Сан акана́ ту, сыр пхурэ́ дыкхнэ́,

Нэ дрэ чиба́ амэ́ндэ зор нанэ́.

Сонэто 107

Мри дар, сыр о Барэ Свэто́скро ди́,

Дыкхи́ хор дро бэрша́, сывэ́ явэ́на,

Дро кан на пхэ́нла ма́нгэ англэды́р,

Коли́ мро камлыпэ́н бэрша́ чёрэ́на.

Бут мо́лы чён хасёлас прэ якха́,

Тэ дылынэ́ раша́ ивья́ ровэ́нас,

Нэ зэлэнёна санорэ́ рукха́,

Соб дурэды́р сарэ́ дужакирэ́нас.

Бэрша́ тэрнякирэ́на камлыпэ́н,

О мэрибэ́н дро васт мэ тасава́ва:

Мэ ачядём ман дро багаибэ́н, –

О билылэ́нгрэ нашавэ́на сла́ва.

Хасёла таґари́тко барипэ́н,

Гилы́ ж ячела дро рипирибэ́н.

Сонэто 108

Со мри годы́ илэ́скэ роспхэнэ́ла,

Коли́ тут на джинэ́ла, сыр ило́?

Мро камлыпэ́н нэвэ́с посыкавэ́ла,

Или тыро́ ило́ патывало́?

Ничи́, мро гудлыпэ́н. Мэ со дывэ́с

Сыр бы моли́тва тукэ бичява́в:

«Мэ сом тыро́, ту сан мири́», — нэвэ́с,

Сыр пэ́рво мо́ло ушундём тро лав.

Коли́ о камлыпэ́н нэвэ́с явья́,

О пра́хо про ґэра́ на притырдэ́лас,

О штэ́то вашэ бры́нды на дэя́,

О пхурипэ́н робо́са рикирэ́лас.

Сыр бияндя́пэ камлыпэ́н — барьёла,

Кай бэрш тэрдо́, кай о ило́ дыксёла.

Сонэто 109

Ман на́ кхар николи́ «банго́ ило́»,

Мэк бимиро́ адя́кэ сыкадёла;

Нашты́, соб ма́ндыр тэ джива́в нашло́,

Э дёстыр, со дро тро колы́н пасёла.

Тыро́ колы́н мрэ дёскэ — кхэр ячья́,

Сарэ дромэ́ндыр рисёва́в палэ́;

На парудёмпэ (бэрш парудыя́),

Сыр на́бут, — ваш доша́ мрэ мэлалэ́

Паны́ яндём. На сом «банго́ ило́»,

Мэк сарэ грэ́хи дро мро рат латхьём,

На сом адя́кэ напатывало́,

Соб ваш ничи́ саро́ мэ чюрдэём.

Ничи́ ваш ма́нгэ — свэ́то да баро́,

Ра́кх пэс, мри ро́за, кай саро́ миро́.

Сонэто 110

Чячё, чячё! Ада́й-одо́й псирдём,

Дылнякирдём ваврэ́н дылынэ́ мо́са.

Мри куч годы́ мэ на́куч бикиндём,

Камьём: пхурья́ — ґэра́са, нэвя́ — дёса.

Буты́р чячё! Дыкха́вас чячипэ́н

Бангэ́ якхэ́нца: нэ фэды́р сарэ́ндыр,

Со налатхьём вави́р мро тэрныпэ́н:

Тыро́ ило́ — машки́р бутэ́ ваврэ́ндэ.

Саро́ скэрдо́! Прэ ачядэ́ бэрша́

Мри бокх на ла́ва тэ росхачкира́в,

Тут на чюрда́ва ваш нэвэ́ доша́,

Мри дэ́вэлны, мэ тукэ пэс отда́в.

Прилэ́ ман, кай сы болыбэ́н миро́,

Дава́ сы: прэ шука́р колы́н тыро́.

Сонэто 111

Ту сан мирэ́ Судьба́са прэ чюрья́!

Дрэ мрэ доша́ — да дэвэлны́ банги́,

Ёй на фэды́р дром ма́нгэ сыкадя́,

Сыр свэ́то, со дыя́ зуми́ нанги́.

Нэ попэём: мро лав сы про чека́т.

Со тэ кэра́в? Бутя́кэ мэ подда́впэ,

Сыр о котля́ри: лэс выдэ́ла гад.

Пожа́линэ ту ман — нэвякира́впэ.

Сыр пацыенто, ла́ва тэ пия́в

Драба́, соб мро насвалыпэ́н традэ́нас,

Со киркипэ́н — кирко́, на сыкава́в,

Буты́р дукх дэ́на, соб мишто́ кэрэ́нас.

Пожа́линэ ту ман, мэ совлаха́ва:

Тырэ́ илэ́са высастякира́ва.

Сонэто 112

Тро камлыпэ́н э дукх ковлэ́с злыя́,

Сави́ о свэ́то задыя́ ладжя́са;

На ха́ла ман, со ёв патя́ндыя,

Коли́ ту ман про лачё дром лыджя́са.

Ту — свэ́тыцо миро́, напарудэ́

Чяче лава́ шуна́в тырэ́ чибатыр,

Сарэ́ ваврэ́ ваш ма́нгэ — на джидэ́,

Мэ закэрдём миро́ колы́н дукха́тыр.

Свэто́стыр сы ракхнэ́ мирэ́ кана́:

Кошэ́на ль ман, шарэ́на ль — на шуна́ва

Ваврэ́нгирэ глоса́ мэ акана́.

Ды́кх, со, прэ ладж дыкхи́, мэ выкэда́ва:

Ту акадя́кэ ма́ндэ дро ило́,

Со саро свэ́то сыр бы сы муло́.

Сонэто 113

Сыр битыро́, якха́ — дро мро ило́,

На одолэ́, со дром, хай, сыкавэ́на,

На кэ́рна одолэ́, со припхэндло́,

Дыкхи́, пиро́ чячё — и на дыкхэ́на.

Ёнэ́ родэ́н илэ́стыр три патри́н,

Кай чирикло́, кай цвэ́то — на полэ́на:

Илэ́скэ лэ́ндыр — саво про́ко сын?

Ничи́, со сы дыкхно́ на ухтылэ́на:

Со на́шукар, со сы шука́р чячес,

Со сы дрэва́н кирно́, со го́жо сын:

Мэк о паны́, мэк бэ́рга, рат-дывэ́с –

Саекх дыкхэ́на три гудлы́ патри́н.

Нашты́ буты́р: ило́ пирда́л дукха́

Сунэ́нца хохавэ́ла мрэ якха́.

Сонэто 114

Тэлэ́ коро́на камлыпна́скири

Чёрдэ́ ли мри годы́ шарибэна́?

Мишто́ дыкхэ́ла ка́жно якх мири́,

Нэ уджиндя́ драбакирибэна́?

Трэ камлыпна́стыр ёй лачякирэ́ла

Пфуй джидыпэ́н, сыр а́нгело шука́р,

Со на́лачё — жужо́ ёй сыкавэ́ла,

Сыр попэрэ́ла дрэ вэсны́тко бар.

Мири́ годы адя́кэ матькирэ́на,

Нэ бахтало́ сом дро матвалыпэ́н,

Мирэ́ якха́ годя́кэ служынэ́на:

Хохаибэ́н ваш лэ́нгэ кэравэ́н.

Ада драба́ ячена гудлэды́р,

Сыр мрэ якха́ лэн пьена англэды́р.

Сонэто 115

Мэ хохадём тут дрэ мирэ гиля́,

Со тут буты́р, сыр мэ камьём, нашты́,

На сыс пхэрдэ́ сарэ мрэ совэля́,

Кана́ буты́р хачки́рла яг таты́.

Бэрша́ саро́ про свэ́то парувэ́на,

Пхаги́рна совэля́ и таґарьен,

Шукарипэ́н, йо лав чячё чёрэ́на,

Годы про дром бандякирдо́ чюрдэ́н.

Дари́ ада зорья́тыр, акана́

Пхэна́ва, со кама́м кана́ буты́р,

Патя́ва екх дро паруибэна́,

Ада дывэ́с буты́р сы, сыр вави́р.

Сыс камлыпэ́н миро́, сыр о тыкно́,

Кана́ сарэ́са куч выбарино́.

Сонэто 116

Нашты́ тэ пхагира́в о бья́в тыро́

ваврэ́са. Камлыпэ́н на парудёла,

Паруибэ́н лэс на мэкэ́л псиро́,

Нашля́са на нашэ́ла, отджидёла.

Нат! Камлыпэ́н сы ракхибны́тко яг,

Лыджя́ла пирэ вьюги и ракхэ́ла.

Сыр э черґэ́н, о болыбны́тко якх,

Чячё дром пиро мо́рё сыкавэ́ла.

О камлыпэ́н нанэ́ бэрша, — ёнэ́

Чёрэ́на ро́зы тэрнорэ́ муендыр;

Нанэ́ ратя́ матэ́ совнакунэ́,

Коли́ ж дживэ́ла буты́р шэлбэршэ́ндыр.

Сыр мри гилы́ на пхэ́нла чячипэ́н,

Нанэ́ гилы́, нанэ́ о камлыпэ́н.

Сонэто 117

Ко́ш ман адя́кэ: саро́ нашадём,

Ничи́-ничи́ на плэскирдём палэ́;

Ко камлыпэ́н о дром забистырдём,

Мэк туса дывэса́ лаче спхандлэ́;

Мэ нашава́вас о бэрша́ ваврэ́нца,

Тырэ́ куч дывэса́-ратя́ чёрдём;

Мэ лыджиёмпэ сарэ́ балваленца,

Собы аври́ якхэ́ндыр хасиём.

Ги́н пирэ ангушта́ мирэ́ доша́,

Ги́н процэнтэ́нца, ги́н сарэ́ дукха́са,

Соб мэ, камлы́, ман туса тэ коша́в, –

Нэ на́ дыкх адалэ́ киркэ́ холя́са.

Коли́ и сыр кошэ́са, ґалёва́ва,

Со ман камэ́с, со тукэ мэ патя́ва.

Сонэто 118

Сыр бы э бокх фэды́р росхачкира́сас,

Тало́й хачки́рла сано́ киркипэ́н;

Сыр бы насвалыпэ́н криг протрада́сас,

Коли́ киркэ драба састякирэ́н.

Пхэрдо́ мэ сомас тырэ́ гудлыпна́са,

Мрэ киркэ думы чяляки́рнас ман;

Ман, насвалэ́с тырэ́ барвалыпна́са,

Придуминдлэ́ дукха́ лынэ́ тэ хан.

О камлыпэ́н насвалыпэ́н нанэ́:

Ада́савэ састэ «насвалыпна́стыр»

Ивья́ киркэ драба тэ пьен лынэ́, –

Нашты́ ило́ тэ традэ́л э хула́стыр.

Мэ ґалыём: вашэ миро́ ило́

Драба — ничи́, сом тутыр насвало́.

Сонэто 119

Савэ́ драба́ пиём? Киркэ́ ясва́,

Со ачядэ́ Сирены? На джино́м.

Дужакира́в, дара́в, сыр дро тхува́:

Со дорэстём — екха́тыр нашадём.

Бут грэ́хи ли скэрдя́ миро́ ило́,

Коли́ ман бахт и зор пхэрдякирэ́нас? –

Со мэ пэём адя́кэ насвало́,

Дукха́тыр мрэ якха́ аври́ ухтэ́нас.

Шара́в холы́! Джино́м, со ёй куч мо́л:

Со сы фэды́р, бида́тыр выбарьёлас,

О камлыпэ́н гэя́, соб тэ рисёл

Бут гожэды́р, сыр англэды́р дыксёлас.

Миро́ насвалыпэ́н мэ на костём:

Со нашадём, трин мо́лы дорэстём.

Сонэто 120

Ту са́нас на́ковлы. Кана́ дыксёна

Мри дукх и туга: бут дынэ́ ёнэ́.

Пал мро паруибэ́н мэ дав покло́но,

Сыр мирэ нервы саструнэ́ нанэ́.

Коли́ ж мэ кокоро́ дукх тукэ да́вас,

Сыр ма́нгэ ту, — дро а́до ту джиндя́н.

Мэ, на́лачё, палсо́ бы зрипира́вас,

Прэ умбладэ́[71] чюрда́вас, со кэрдя́н.

Да рат кирки́ анги́л якха́ тэрдёла:

Cыр туга дандырэ́л, на забистра́в;

Соб сыгэды́р тыро́ ило́ састёлас,

Камлэ́с тут ко колы́н притасава́в.

Со ту кэрдя́н, кана́ отплэскирдо́,

Сарэдуенгэ счёто[72] закэрдо́.

Сонэто 121

Фэды́р я́в на́лачё, сыр на́лачё дыксёв,

Тэ тут тэ дэ́н на лэ́на прэ чиба́,

Тырэ́ бахтя́кэ на пхэнэ́н: «Хасёв!».

Илэ́скэ па́тя: мо́л ничи́ драба́.

Палсо́ б кирнэ́ ваврэ́нгирэ якха́

Рат хачкирдо́ тэ на́ шылякирэ́н?

Палсо́ б ма́нгэ прэ лэ́ндэ тэ дыкха́в?

Со ма́нгэ — куч, ёнэ́ «кирно́» кхарэ́н.

Мэ сом со сом, нэ мирэ учипна́са:

Ёнэ́ мирэ́ бутя́ бангэ́с дыкхэ́н.

На сом банго́, амэ́ ваврэ́с гина́са,

На сыкава́в одо́, со на полэ́н.

Патя́на, хай, сарэ́ ваврэ́ — кирнэ́,

Нэ мануша́ нанэ́ жэ, сыр ёнэ́.

Сонэто 122

Дрэ мри годы́ кучес мэ рикира́ва,

Со прэ лыла́ ту ма́нгэ бичядя́н,

Мэ николи́ дава́ на забистра́ва,

Сыр го́жэс дро миро́ ило́ ту сан.

Жыка́й годы́, ило́ — бэрша́ зорья́са

На парувэ́н дро пра́хо, сыр саро́,

Рипирибэ́н миро́ трэ патриня́са

На розкэдэ́лпэ, джиибэ́н миро́!

Ада лыла́ на дя́кэ зоралэ́,

На трэ́би мрэ годя́кэ чибало́,

Нэ мэ на да́ва тукэ лэ́н палэ́,

Ту сан дрэ лэ́ндэ, буты́р — дро ило́.

Сыр дав рипирибэ́н дрэ тыкнори́?

Тут рикира́ва дрэ годы мири́.

Сонэто 123

Бэрша́ ивья́ пхутёна: парува́впэ,

Ёнэ́ ґаздэ́на — мэк нэвэ́ нанэ́ –

Да пирами́ды, да́са совлаха́впэ,

Кэрэ́на пирэ мо́ды пуранэ́.

Мэра́са сыг; бэрша́ чювэ́н про свэ́то

Пуранэ и́дя, на́бут парудэ́;

Жыка́й амэ́н рики́рна про да штэ́то,

Патя́са, со амэ́нца высыдэ́.

Бэрша́ скэдэ́на патриня́, лыла́,

Нэ ман ивья́ диво́са хохавэ́на:

Дрэ бар тэрны́ дыкха́ва трушыла́:

Палсо́ ж бэрша́ уса́ сыгякирэ́на?

На парува́впэ, дав совэ́л мири́,

На́ дыкхи прэ бэршэ́нгири чюри́.

Сонэто 124

Коли́ б явья́н родо́са бахталы́,

Или пхивля́кири э чяй кирки́,

Бахт пиро лачипэ́н или холы́

Кэрдя́ тут цвэ́то или чяр шуки́.

Нат, мри камлы́! На бахт тут бичядя́,

Мро камлыпэ́н бахтя́тыр на дарэ́ла,

Лэс николи́ бы би́бахт на чёрдя́,

О мангипэ́н буты́р лэс на ґаздэ́ла.

Ничи́ на дужаки́рла одолэ́ндыр,

Кон кокоро́ про чя́со[73] уклистэ́с,

Барьёла пэ́скэ пэ́скирэ зорьендыр,

Кхам и брышы́нд на даравэ́на лэс.

Па́тя, тэ одолэ́ дава́ джинэ́на,

Савэ́ дрэ мэл на мэ́рна, нэ дживэ́на.

Сонэто 125

Коли́ б мэ патыва́са рикирдём

О по́лого,[74] кай сы бэшло́ таґари,

Или прэ веки со-то ґаздыём –

Мэк барвало́, кирно́, сыр о злыда́ри![75]

Нат! Мэ дыкхтём бахтя́ прэ екх дывэ́с,

Екха́тыр нашадэ́ — тэ упрэды́р,

Забистырдэ́, сыр тэ дживэ́н миштэ́с,

Ваш адава́, со кха́рна «фэдыды́р».

Нат! Мэ патя́ва дро тыро́ ило́,

Ха́ мро маро́, мэк чёроро́, прэ во́ля,

Нанэ́ хохаибэ́н до барвало́,

Кай роскэра́са екх варэ́са до́ля.

Джя́ «на́жужо», тут на кандэ́л ило́,

Дро пхарипэ́н ячелпэ зорало́.

Сонэто 126

Шука́р тыкно́, кари́к бэрша́ традэ́са?

Мардэ́[76] лыджя́са и пририкирэ́са,

Барьёса, сыр тырэ́ камлэ́ шутёна,

Коли́ бэрша́, со ачядэ́, тыкнёна.

Э Дай Бари́ саро́ жэ умарэ́ла,

Со нашавэ́са, ёй крэнцакирэ́ла.

Сан Ла́тэ, соб бэрша́ дрэ ладж мэнэ́,

Ума́рла Ёй минуты прогэнэ́.

Дар Ла́тыр, мро гудло́, мэк ёй камэ́ла,

Нэ кажнонэ́с, коли́ камэ́л, чюрдэ́ла.

Ёй на екха́тыр вытховэ́л Тими́н,

Сыр плэскирэ́с ту, нашавэ́с бажын.

Сонэто 127

Ґара́ Кало́ на сыс гиндло́ шука́р,

Мэк сыс, на сыс Шукарипэ́н про лав.

Кана́ Калэ́с лэ́скрэ чявэ́са кха́р!

Тэ чячюнэ́с, сыр э злыдня́с,[77] пуса́в!

Тэ ка́жно васт, сыр Дай Бари́ кэрэ́ла,

Тэ мо́са хоханэ́са вытховэ́лпэ:

О лав Шукарипэ́н, хай, нашавэ́ла

Дрэ ладж, коли́ пало бов на мангэ́лпэ.

Сы адатхы́р мири́ камлы́ калы́:

Пхувья́, якха́ — сыр туга трашанэ́с,

Пал кажнона́тэ, кон на бияндлы́

Шука́р, нэ подкэрды́ сы хоханэ́с.

Сыр туга — да́сави, саекх куч мо́л:

Пхэнэ́ла ка́жно, сыр шука́р дыксёл.

Сонэто 128

Коли́, мри музыка, тховэ́са ангушта́,

Соб тэ кхэлэ́л, со куч камэ́л ило́,

Ками́, прэ да дрэва́н шардэ́ кашта́,

Мэ на́ками кэра́впэ насвало́.

Мэ на кама́м: да чибалэ́ кашта́

Тырэ́ васта адя́кэ чилавэ́на,

Коли́ мрэ бокхалэ́ джидэ́ вушта́

Лэн акана́ ками́ на чюмидэ́на.

Коли́ тырэ́ кхэлэ́на ангушта́,

Локхэ́с саро́ про свэ́то парувэ́са:

Бахталэды́р, на чёрорэ́ вушта́,

Кашта́ багаибны́тка ту кэрэ́са.

Сыр бахтяки́рла кхэлыбэ́н кашта́,

Дэ́ лэ́нгэ ангушта́, ма́нгэ — вушта́.

Сонэто 129

Тими́н бари́ палэ яг камады́ –

Ладж нашады́, нэ со ди дорэсэ́ла?

Начялыпэ́н, о рат, бокх бишарды́,

Хохаибэ́н пхэрдэ́ вастэ́са лэ́ла.

Коли́ э яг холя́са мурдыя́,

Оди́, ла на́ ками, аври́ традэ́ла,

Нэ кон одо екх мо́лыцо хая́,

Ёв э годы́, йо ми́ро нашавэ́ла.

Яга́тыр нашавэ́ла ёв ило́,

Ёй прэ хула́стэ сы́го раинэ́ла:

Гудлы́ — прэ якх, кирки́ — коли́ чяло́,

Бахт — англэды́р, суно́ — коли́ нашэ́ла.

Одо джиндло́, нэ свэ́то вса заджя́ла

Дро ра́йо,[78] со ко а́до лэс лыджя́ла.

Сонэто 130

Якха́ мрэ хуланя́тэ — кхам нанэ́,

Вуштэ́ндыр лолэды́р дрэва́н куч ла́ло,[79]

Парно́ сы ив? Чючя́ пхарэ́с парнэ́.

Нанэ́ пхар — бал кало́, сыр чяр издра́ла,

Лолэ́, парнэ́ мэ ро́зыцы дыкхтём,

Нэ на барьён прэ ла́кирэ чямья́,

Парфюмо кучеды́р кхандэ́л, джино́м,

Сыр ёй пхурдэ́л, на хохава́в ивья́.

Кама́м ла тэ шуна́в, — мри хуланы́

Саекх нанэ́ прэ екх пхал[80] кудуненца,

Мэ на дыкхтём, сыр пси́рла дэвэлны́,

Мири́ псирэ́ла пирэ пхув ґэрэ́нца.

Саекх патя́ва: ваш мро камлыпэ́н

На трэ́би хохано́ до шарибэ́н.

Сонэто 131

Сан на́лачи сави, сыр э вавря́,

Конэ́стэ гожыпэ́н ячья́ холы́.

Сыр ту джинэ́с мишто мрэ виндырья́,

Сы дро ило́ куч бар — ту, мри камлы́.

Раки́рна, хай, на дя́кэ сан шука́р,

Соб мро ило́ дукха́тыр тэ ровэ́л.

Ни лав ни паш мэ пр адава́ дрэ дар,

Нэ совлаха́ва, свэ́то хохавэ́л.

Шэл мо́лыцы туга́тыр мэ мэём,

Паш ма́ндэ на́ дыкхи тро муй лачё,

Мирэ шэрэ́са мэ совлахадём,

Яви́ калы́, ту сан шука́р, чячё.

На трэ калэ́ якхэ́ндыр мэ мэра́ва,

Тырэ́ калэ́ бутендыр хасёва́ва.

Сонэто 132

Кама́м тырэ́ якха́: ман жалинэ́на,

Дыкхи́, сыр тро ило́ дукх ма́нгэ дэ́ла,

Калэ́са уридэ́, хай, тугинэ́на,

Коли́ дукха́тыр мро ило́ мэрэ́ла.

Нанэ́ адя́кэ куч о кхам прэ зо́ря

Про муй парнэбалэ́нгро — болыбэ́н,

На дя́кэ сы шука́р черґэ́н прэ зо́ря

Вави́р, коли́ калыпэна́ пэрэ́н.

Дуй мо́лы кучеды́р якха́ туги́тка.

Палсо́ нанэ́ саво́ тыро́ ило́?

Палсо́ традэ́ла дя́кэ би-илы́тко

Ман, чёрорэ́с, ачелпэ шылало́?

Сы гожыпэ́н — кало́, патя́ндыём,

Сыр трэ якхэ́ндыр адава́ джино́м.

Сонэто 133

Риски́р тыро́ ило́: дукх ма́нгэ дэ́ла,

Чинги́рла мрэ друго́скэ илоро́!

Миро́ ило́ о чялыпэ́н на лэ́ла:

Робо́стэ ро́бо друго сы миро́!

Тырэ́ якха́ ман ма́ндыр жэ чёрдэ́,

Друго́с ту пхарэды́р притасавэ́са:

Лэс, ман и тут, манга́в, прэ во́ля дэ́!

Трин мо́лы трин илэ́ ту хаськирэ́са.

Лэ мро ило́ дро саструно́ колы́н,

Нэ мрэ другоскирэ́скэ во́ля дэ́!

Кэ ёв притхо́в ман, кай камэ́с бики́н,

Кари́к мэ да́впэ? Тринджинэ́ скхудэ́!

Одо камья́н! Сыр ман ту ухтылдя́н,

Саро́, со сыс миро́, дро васт лэя́н.

Сонэто 134

Кана́ мэ совлаха́ва: ёв — тыро́,

Дро тыро васт, сыр ко́фо, попэём,

Нэ акана́ мэк ёв, вави́р миро́,[81]

Фэды́р кэрэ́са, со лачё скэрдём.[82]

Тумэ́ жэ на чюрдэ́на екх ваврэ́с,

Ту — скэ́мпо, ёв — пирда́л ковло́ ило́;

Пал ма́ндэ лав дыя́ патывалэ́с

Тэ зоралэ́с ячела ёв спхандло́.

Саро́ ту гожыпна́са дорэсэ́са,

О ко́фо ухтылэ́са, кай камэ́с,

Пал ма́ндэ лэс кэ пэ ту закэдэ́са,

Пал миро длуго хаськирэ́са лэс.

Лэс нашадём, лэя́н ту амаро́,

Ёв выкиндя́ ман, нэ на сом псиро́.

Сонэто 135

Сы кажнона́тэ, со родэ́л, — нэ Кам[83]

Мэк тэ авэ́л (ава́в) тро екхоро́;

Сыр ваш дывэ́с ухты́лла[84] екх до кхам,

Гудлякира́ва камлыпэ́н тыро́.

Бутэ́н камэ́са ту, сыр буґлыпэ́н:

Соб ман тэ гаравэ́с штэ́то латхэ́са,

Коли́ ваврэ́нгэ дэ́са ковлыпэ́н,

О Кам тыро́ (хачёла ёв!) прилэ́са.

Баро́ паны́ брышы́нд на вычюрдэ́ла,

Мэк на́бут лэ́стыр ко́фо дорэсэ́ла,

Лэ ма́ндыр, мэ сом тыро Кам, — ячела

Буты́р тро Камлыпэ́н, сыр ман прилэ́ла.

Нэ я́в ковлы́, лав на́ чюв хачимэ́,

Саро́, со ту родэ́с, дава́ сом мэ!

Сонэто 136

Сыр тыро ди́ ман лэ́ла тэ традэ́л,

Пхэ́н лэ́скэ, со мэ сом о Кам тыро́,

Тэ ка́жно ди́ о Камлыпэ́н прилэ́л,

Мэк тэ дэ́л ма́нгэ, со кама́м, саро́.

Пал адава́ баро́ дав миштыпэ́н,

Тэ бут амэ́н ваш камлыпэ́н мэ да́ва,

Дрэ барвалэ́ бутя́ — мро чячипэ́н:

Екх сы ничи́, — мэ тукэ ракира́ва.

Дрэ бутыпэ́н мэ екх, на сом кхардо́,

Нэ екхоро́ сом дрэ тыро́ ило́;

Мэ, сыр ничи́, сом туса рикирдо́,

Мэк тэ кэра́в ваш тукэ Кам гудло́.

Мро лав сы «Кам», ту ка́м! Сарэ́ джинэ́н:

Коли́ камэ́са — сом тро Камлыпэ́н.

Сонэто 137

О камлыпэ́н дылнёла кокорэ́с,

Хохаибэ́н чювэ́ла дрэ якха́.

Кай сы шукарипэ́н, дыкхтём миштэ́с,

Со — пфуй тэ со — лачё, на роскэда́в.

Коли́ мирэ́ якха́ короринэ́,

Залыджия́н ту ман, кари́к ваврэ́н.

Палсо́ тырэ́ якха́ ман на мэкнэ́,

Мирэ́ илэ́скэ во́ля со на дэ́н?

Палсо́, дыкхи́ прэ тутэ, мро ило́,

Сыр свэ́тыцо саро́, хай, на патя́ла?

Мирэ якха́ латхэ́на захало́

О чячипэ́н, со зоралэ́с ланга́ла.

Сы чячипна́стыр криг якха́, ило́:

Дрэ да насвалыпэ́н сом бахтало́.

Сонэто 138

Коли́ ёй совлаха́ла, сыр жужэ́,

Патя́ва. Нэ, патя́ва: хохавэ́ла.

Нисы́р на ґалыя́ ёй, трэ́би жэ:

О свэ́то ман киркэ́с сыклякирэ́ла.

Мэк тэ ґалёл, сыр ґалыём дрома́,

Патя́ва: ёй патя́ла, хай, тэрно́;

Мэ, хай, подда́впэ, хохавэ́ла ман:

Дуендэ чячипэ́н муя́л дыно́.

Нэ, сыр пхэнэ́ла ёй, хай, хоханы́?

Нэ, сыр пхэна́ва мэ, хай, сом пхуро́?

Дро камлыпэ́н э бахт — бангэ́с ракхны́,

Бангэ́с о бэрш гинэ́лпэ лэ́скиро.

Адя́кэ хохава́са екх ваврэ́с,

Нэ кхэтанэ́ джива́с амэ́ миштэ́с.

Сонэто 139

На́ манг, соб туса мэ тэ хохава́в,

Тро на́ртыма ило́ мро тасавэ́ла;

Дэ́ ма́нгэ дукх чиба́са — рикира́в,

Якхэ́нца на́ мар: фрэ́нтыма чинэ́ла.

Пхэ́н, со ваврэ́с камэ́с, нэ дрэ якха́,

На́ дыкх кэ риг: пхэндя́н, нэ и авэ́ла:

Хохаибэ́н зоралэды́р дукха́л,

Сыр тыри зор прэ ма́ндэ раинэ́ла.

Бистра́ва, нэ ило́ джинэ́л миштэ́с:

Тырэ́ якха́ джинэ́н, сыр тэ марэ́н,

Ґалёв, прэ ма́ндэ сыр дыкхэ́с бангэ́с,

Скэдэ́с э зор, соб тэ марэ́с ваврэ́н.

Ды́кх дрэ якха́! Сыр гаравэ́с чюри́,

Ума́р екха́тыр ман и дукх мири́.

Сонэто 140

Кицы́ сан холямы́, яв годяви́р,

Ту на́ чилав мри туга, соб лава́

Киркэ дукха́са, э чюрья́са сыр,

Тэ на́ пхэнэ́н чячес пал адава́.

Мэк мэ шука́р сарья́ тут ґалыём,

Пхэ́н ма́нгэ хоханэ́с, хай, ман камэ́са;

Сыр насвало́, хай, паш-муло́ мэ сом,

Адя́кэ на́бут ман подрикирэ́са.

Дужакири́ да лав, мэ нашава́в

Годы, тэ ла́ва тут коша́в кирнэ́с:

О кирно́ свэ́то ка́жно кирно́ лав

Кирнэ́ канэ́нца лэ́ла бахталэ́с.

Соб э ладжя́тыр пэс ту тэ зракхэ́с,

Дыкх дрэ якха́, хоха́в патывалэ́с.

Сонэто 141

Чячё, кама́м мэ на якхэ́нца тут,

Дрэ тутэ бут шэла́ доша́ латхэ́н,

Миро́ ило́ кошэ́лпэ лэ́нца бут,

Тэ на́дыкхи бьянэ́л о камлыпэ́н.

Нанэ́ мирэ́ кана́, соб тыри чиб

Лэн гудлыпна́са го́жэс хохадя́,

Нанэ́ мри чиб, мро накх, мро васт, — коли́ б

Мэ ґалыём, ман со́са припхандя́н.

Со сарэпа́ндж мирэ́ чюибэна́?[85]

Ило́ лэн на кандэ́ла екхоро́,

Паты́в-ладж нашавэ́ла, соб тэ на́

Чюрда́в тут, тыро ро́бо чёроро́.

Дрэ би́бахт мэ екх ко́фо дорэса́ва:

Мро грэ́хо — ту, ваш тукэ хасёва́ва.

Сонэто 142

О грэ́хо, со кама́м тут, на ивья́

Кошэ́са, — сы о грэ́хо адава́,

Нэ сы буты́р тыри́ дош адая́,

Дрэ тутэ кай латхэ́са патыва́?

Сом дрэ доша́, нэ мэк вушта́ тырэ́

Тэ на́ чюрдэн прэ ма́ндэ арманя́:

Лолэ́ — ладжя́тыр, совэля́ пхарэ́

Бангэ́с лэн чяравэ́на хоханя́.

Нанэ́ до грэ́хо, ту, сыр мэ, камэ́с

ваврэ́н, нэ тут, сыр ту ман, на камэ́на:

Коли́ бы ковлэды́р ту тэ явэ́с,

Ґалёв, и тукэ грэ́хи простинэ́на.

Коли́ сы тутэ со тэ гаравэ́с,

Ту про́стинэ, и тукэ дэн миштэ́с.

Сонэто 143

Сыр дэ́лпэ тэ ухты́лл э хуланы́,

Тэлэ́ змэки́ вастэ́ндыр тыкнорэ́с,

Каґня́, сави́ барья́тыр дур нашны́,

Соб ла тэ дэ́с про штэ́тыцо миштэ́с,

Э дай, э чяворэ́с тэлэ́ чюви́,

Мэк роиндо́й, праста́ла пирэ чяр

Тэ дорэсэ́л ада каґня́, сави́

Урня́ла ла́тыр, — чяворо́ прэ штар.

Коли́ со криг урня́ла, ухтылэ́са,

Тэ мэ, сыр чяворо́, кхара́в палэ́:

Кэ мэ палэ́ яв, коли́ дорэсэ́са,

Чюми́дэ ман, лэ дрэ васта́ ковлэ́.

Мэ тут манга́в: ухты́л, со ту камэ́с,

Рисёв, мро роибэ́н штылякирэ́с.

Сонэто 144

Дро мро ило́ прэ би́бахт и прэ бахт

Сы дуйджинэ́, дром ма́нгэ сыкавэ́н:

Лачё сы — мурш, шука́р ёв зорало́,

Холы́ — джювлы́, ёй сы о калыпэ́н.

Соб ман тэ дэ́с дро а́до, шукарны́

Злыджя́ла гожыпна́са мрэ лачес,

Камэ́л тэ парувэ́л да бэнгланы́

Э свэнтонэ́с, соб тэ кэрэ́л бэнгэ́с.

Сыр ада мурш ячелпэ парудо́,

Ґалёв, прэ ма́ндэ ёв, сыр ёй, уштэ́ла;

Сы машкир лэ́ндэ ми́ро куч скэрдо́,

Ваврэ́скэ ж ка́жно а́до рикирэ́ла.

Кон сы лачё, кана́ на ґалёва́ва,

Жыка́й ваврэ́с дро а́до на дыкха́ва.

Сонэто 145

Куч камлыпэ́н скэрдя́ вушта́.

Пхэндлэ́ екх ма́нгэ: «На́дыкхав!» –

Мро ди́ рики́рна ангушта́:

Дыкхи, даратыр, хай, мэрав,

Пожалиндя́ ман чёрорэ́с:

Сыр англэды́р э чиб пхэндя́,

Буты́р ваш ма́нгэ гудлорэ́с

О лав кирко ёй парудя́:

«Мэ на́дыкхав!»… — Тэ рат калы́

Татэ кхамэ́са традыны́,

Латэ якхэндыр криг нашлы́,

Сыр тэлэ пхув сыс чюрдыны́:

«Мэ на́дыкхав!..» — холя́са ёй, –

«…на тут,» — тэ ман зракхья́ одо́й!

Сонэто 146

Чёроро́ ди́, кай грэ́хи мрэ́ дживэ́н,

Тырдэ́на тут про дром о хохано́:

Соб тэ чялякирэ́с бокхалыпэ́н,

Соб тэ макхэ́с куч, со дура́л дыкхно́.

Палсо́ ваврэ́скро кхэр дро кучипэ́н

Ту рикирэ́са пал ловэ́ барэ́?

Коли́ кирмэ ивья́ саро́ залэ́н,

Чюрдэ́н пирэ балва́л бутя́ тырэ́.

Джив пр адава́, со кэ́рна бутджинэ́,

Тхо́в кхэтанэ́ саро́ дро миштыпэ́н,

Кин шэлбэрша́ пал дывэса́ кирнэ́,

Яв пфуй — явря́л, андрэ́ — дро чялыпэ́н.

Чёр мэрибна́стыр, манушэ́ндыр — ёв,

Мэрэ́ла мэрибэ́н, ту на́ хасёв!

Сонэто 147

Кама́м, сом дрэ здраны́, дава́ родав,

Со састяки́рла мро насвалыпэ́н,

Дукх закэдэ́ла, дэ́ла со тэ хав,

Соб забистра́вас мро бокхалыпэ́н.

Мэк тэ састякирэ́л ман мри годы́! –

Холя́сыя, со ла мэ на канда́ва,

Гэя́ аври́, годы сы нашады́,

Сыр тэ мэрав, кана́ дужакира́ва.

Гэя́ годы, кэрдя́ вастэ́са: «Яв!»

Мэ, бигодя́киро, кана́ на кхинёва́ва,

Трада́ва дылныпэ́н лав пало лав,

Про чячипэ́н чиба́са попэра́ва.

Совлахадём: ёй сы жужы́, шука́р,

Нэ сыр э рат — калы́, пфуй — сыр э дар.

Сонэто 148

Палсо́ якха́, дыкхи́ начячюнэ́с,

Дро мро ило́ мэклэ́ о камлыпэ́н?

Палсо́ мири́ годы́, ило́ миштэ́с

На лэ́нас лэс аври́ тэ вытрадэ́н?

Коли́ дава́ шука́р ваш мрэ якха́,

Палсо́ кошэ́ла свэ́тыцо саро́?

Екх дош тыкны́, ками́, мэ на латха́в,

Кай бут локхэ́с латхэ́ла годьваро́.

Нашты́, соб ман якха́ тэ хохавэ́н,

Ками́, ёнэ́ сы парудэ́ ясвэ́нца,

Сы ґалыно́, палсо́ пхарэ́с дыкхэ́н,

Сыр кхам, коли́ сы закэрдо́ тученца.

О камлыпэ́н, фрэнтари адава́,

О грэ́хи гаравэ́на дрэ ясва́.

Сонэто 149

Пхэ́н, холямы́, хай, на кама́м мэ тут,

Коли́ мэ кокорэ́с пэс хаськира́ва.

Пал тутэ, пхэ́н, на думина́ва бут,

Коли́ мэ пэс ваш тукэ забистра́ва.

Мро вро́го, сыр конэ́с ту на камэ́с,

Кон на пиро ило́, лэс на́дыкхав,

Коли́ ту ман костя́н начячюнэ́с,

Мэ ра́до со́мас пэс тэ умара́в.

Сави́ бари́ паты́в латха́ва мэ,

Соб тэ на́ тэрдёва́в кэ ту сыр ро́бо?

Коли́ кама́м адя́кэ, хасимэ́,

Тырэ́ кирнэ́ якха́ канда́вас со́бы!

Дрэ три холы́ кэ мэ сы екхоро́:

Камэ́с, соб тэ дыкхэ́н, мэ — короро́.

Сонэто 150

Катхы́р, мри бизорья́кири, да зор,

Соб дро миро́ ило́ тэ раинэ́с?

Соб тэ патя́в, мэк хохавэ́са, хор,

Тэ совлаха́в, хай, сы кало́ — дывэ́с.

Сыр парувэ́са ту саро́ кирнэ́с?

Зор биладжя́кири тыри́ катхы́р,

Со дрэ мири́ годы́ ту сыкавэ́с

О кучипэ́н сарэ́ндыр гожэды́р?

Кон тут сыклякирдя́, соб тэ барьёл

Ваш тукэ мрэ холя́са камлыпэ́н?

Сарэ́ раки́рна, хай, ничи́ на мо́л,

Ками́ манга́ва, на́ шун ту ваврэ́н.

Сыр да барьякирэ́л тро кирныпэ́н,

Буты́р сарэ́ндыр мо́л мро камлыпэ́н.

Сонэто 151

О камлыпэ́н — тэрно́, соб тэ ґалёл

Э ладж, мэк сы, ґалёв, чяй лэ́скири.

Мирэ́ доша́ (ман тэ кошэ́с на мо́л) -

Шукарипэ́н тыро́, мри гудлори́.

Ту хохавэ́сас, тэ адя́кэ ж мэ

Мро ди́ мирэ́ масэ́са хохава́вас,

Мас хохадя́ оди́ нахасимэ́,

Тэ мэ дрэ дылынэ́ндэ ачява́вас.

Шуна́в тро лав, ґаздэ́лпэ ладж мири́,

Тэрды́ учес, прэ тутэ сыкавэ́ла,

Сыс пхутькирды́ пашэ раны́ бари́,

Тэ традыны́ аври́ — тэлэ́ пэрэ́ла.

Кон сыс дро камлыпэ́н тэла́л-упра́л,

Ёв ґалыя́ миштэ́с, сыр ладж тэ хал.

Сонэто 152

Ками́ тут, сом банго́, чячес кошэ́са, –

Дуй мо́лы сан банги́ пир совэля́:

Ромэ́с, сыр ман, камлэ́с, ту хохавэ́са,

Ту дуй илэ́ чюрдэ́са дрэ мэля́.

Сыр пал дуй совэля́ тут бишара́ва,

Коли́ аж дэшудуй мэ пхагирдём?

Ками́ тут, тэ патя́в буты́р на ла́ва

Др одо саро́, палсо́ тут покамьём.

Хай, сан лачи́, совлахадём бут мо́лы,

Нэ камлыпэ́н, паты́в, патяибэ́н

Соб тутэ тэ дыкха́в, ило́ корьёла,

Якха́ локхэ́с латхэ́на, со камэ́н.

Камьём, — хай, сан жужы́, совлахадём.

Ада начячюны́ совэ́л хаём.

Сонэто 153

О Купидо́но тэ совэ́л пэя́,

Диа́на бичядя́ нимфа́ кэ ёв;

Ёй почёрья́л яг камады́ лэя́,

Яндя́ ко шалало́ паны́ — тэ тхо́в!

Тэ акана́ тато́ камаибэ́н

Татьки́рла о паны́, со кэрадёла;

Бут мануша́ пирда́л насвалыпэ́н

Одо́й: панестыр ка́жно высастёла.

О Купидо́но пэ́скэ яг нэви́

Мирэ камля́тэ дрэ якха́ лэя́,

Дро мро колы́н о камлыпэ́н чюви́,

Ёв зумадя́, мишто́ ли хачия́.

Др одо́ паны́ ивья́ пэс тэ ракха́в:

Ман састяки́рна ла́кирэ якха́.

Сонэто 154

Лыя́ Амуро тэ совэ́л, чюдя́

Яг камады́ паш пэ́стэ; э вэшы́тко

Ваш кхэлыбэ́н пхэненца ла чёрдя́

Тэ лыджия́ одоя́ яг биды́тко,

(Яг шэл шэла́ илэ́ захачкирдя́).

Дро чя́киро рикири васторо́,

Ёй ла дрэ шылалы́ ґаны́нг тходя́,

Жыка́й исы́с суто́ о дэвлоро́.

Сы о паны́ яга́са хачкирдо́

Тэ састяки́рла ёв дукх камады́

Бутэ́нгэ, ма́нгэ сыс фэды́р кэрдо́,

Коли́ ман дохая́ екх пхутькирды́.

Яг камады́ паны́ ростатькирдя́,

Нэ о паны́ э яг на хаськирдя́.

Перевод выполнен в июле-августе 2004 (Москва — Албена), 7 и 66 — несколько лет назад, примерно в 1995